17.03.2026 | 11:34
Հայաստանի Պրեմիեր լիգա․ Առաջատարի հաղթանակը, լավագույն ռմբարկուի դուբլն ու տուրի տեսաամփոփումը
ՌԴ-ի օգտին լրտեսության համար ԱՄՆ Ազգային անվտանգության նախկին աշխատակիցը դատապարտվել է 21 տարվա ազատազրկման
Քաղաքականություն
30.04.2024 | 15:36
ԱՄՆ-ում Ազգային անվտանգության գործակալության նախկին աշխատակից Ջարե Սեբաստիան Դալկեն դատապարտվել է 22 տարվա ազատազրկման՝ ազգային պաշտպանության գաղտնի տեղեկատվությունը ռուսական հատուկ ծառայության աշխատակցին փոխանցելու փորձի համար։ Այս մասին հայտնում է ԱՄՆ Արդարադատության նախարարությունը, գրում է DW-ի ռուսական ծառայությունը։
Ըստ դատական փաստաթղթերի՝ 2023 թվականին Դալկեն իրեն մեղավոր է ճանաչել օտարերկրյա գործակալին գաղտնի, չբացահայտված տեղեկատվություն փոխանցելու մեղադրանքի վեց կետերով։
2022 թվականի հունիսի 6-ից մինչև հուլիսի 1-ը տղամարդն աշխատել է գործակալությունում որպես տեղեկատվական համակարգերի անվտանգության ճարտարապետ։ Այնուամենայնիվ, Դալկեն խոստովանել է, որ 2022 թվականի օգոստոսից սեպտեմբեր ընկած ժամանակահատվածում օգտագործել է կոդավորված էլփոստի հաշիվ՝ երեք գաղտնի փաստաթղթերից քաղվածքներ փոխանցելու այն անձին, որը, կարծում է, ռուսական գործակալ է: Այդ անձը, սակայն, Հետաքննությունների դաշնային բյուրոյի սպա է եղել։
Արդարադատության նախարարության տվյալներով՝ բոլոր երեք փաստաթղթերը, որոնցից քաղվածքներ են վերցվել, պարունակում էին ազգային անվտանգության գաղտնի տեղեկություններ, դասակարգված էին որպես հույժ գաղտնի/զգայուն գաղտնի տեղեկատվություն և ձեռք էին բերվել Դալկեի կողմից գործակալությունում աշխատելու ընթացքում:
2022-ի օգոստոսի 26-ին Դալկեն 85,000 դոլար է խնդրել տեղեկատվության համար, որին տիրապետում է։ Խոսելով ՀԴԲ գաղտնի գործակալի հետ՝ նա խոստացել է, որ կկիսվի նոր տեղեկություններով, երբ վերադառնա Վաշինգտոնի իր գրասենյակ։
Դալկեն պայմանավորվել է լրացուցիչ գաղտնի տեղեկությունները փոխանցել Դենվեր քաղաքի կենտրոնում գտնվող Union Station-ում ռուս ենթադրյալ գործակալին: Օգտագործելով համակարգիչ և հրահանգներ, որոնք նա ստացել էր ՀԴԲ-ի գաղտնի գործակալից, տղամարդը նրան տվել է հինգ ֆայլ, որոնցից չորսը պարունակել են ազգային անվտանգության հույժ գաղտնի տեղեկատվություն:
ՀԴԲ-ն Դալկեին ձերբակալել է 2023 թվականի սեպտեմբերի 28-ին՝ ֆայլերը փոխանցելուց րոպեներ անց։
