06.05.2024 | 23:35
Պարեկները ապրիլի 29-ից մայիսի 6-ը Երևանում հայտնաբերել են 4 123, մարզերում՝ 12 068 խախտում
Մամիկոն Ասլանյանը կշարունակի մնալ կալանավորված. ազատ արձակելու միջնորդությունը մերժվեց
Հասարակություն
26.04.2024 | 13:18
Վանաձոր համայնքի ղեկավար Մամիկոն Ասլանյանը կշարունակի մնալ կալանավորված․ Հակակոռուպցիոն դատարանը, դատավոր Սարգիս Դադոյանի նախագահությամբ, որոշում կայացրեց մերժել պաշտպանական կողմի՝ խափանման միջոցը վերացնելու կամ փոփոխելու մասին միջնորդությունը։
Ասլանյանի պաշտպան Արտակ Ոսկանյանը նախորդ նիստին ներկայացված միջնորդության հիմքում նշել էր այն հանգամանքը, որ գործում առկա բոլոր գրավոր ապացույցները հետազոտվել են, հարցաքննվել են բոլոր վկաները, և այդ պայմաններում Մամիկոն Ասլանյանին կալանքի տակ պահելու հիմքը դարձել է առարկայազուրկ։ Ոսկանյանը դատարանին առաջարկել էր ընտրել ստորագրություն չհեռանալու մասին խափանման միջոցը, ծայրահեղ դեպքում սահմանել գրավ 2 միլիոն դրամ գրավի չափով։
Լսելով դատավարական կողմերին, դատարանը որոշում կայացրեց կրկին մերժել կալանքը փոխելու մասին միջնորդությունը։ Ասլանյանն անազատության մեջ է գրեթե 2.5 տարի։
Հիշեցնենք, որ Մամիկոն Ասլանյանը մեղադրվում է պաշտոնավարման տարիներին կեղծ փաստաթղթեր կազմելու միջոցով Վանաձորի հողերն օտարելու համար։ Ըստ մեղադրական եզրակացության՝ Սուրեն Աբովյանն օժանդակել է պաշտոնատար անձ հանդիսացող Վանաձոր համայնքի ղեկավար Մամիկոն Ասլանյանի կողմից պաշտոնական լիազորություններն անցնելուն և պաշտոնական կեղծիք կատարելուն:
Քննչական կոմիտեն հայտարարել էր, որ առերևույթ տվյալներ են ձեռք բերվել՝ 2016 թ. հոկտեմբերի 10-ից մինչև 2021թ. հոկտեմբերի 10-ն ընկած ժամանակահատվածում Վանաձոր համայնքի ղեկավարի պաշտոնը զբաղեցրած Մամիկոն Ասլանյանի կողմից իր պաշտոնեական լիազորությունները չարաշահելու և մի շարք այլ հանգամանքների վերաբերյալ: Ասլանյանը չի ընդունում մեղադրանքը, իսկ պաշտպանական կողմը պնդում՛ քաղաքական հետապնդում է իրականացվում։
2022-ի մայիսից Վանաձորը ղեկավարում է վարչապետի կողմից նշանակված ժամանակավոր պաշտոնակատար Արկադի Փելեշյանը։
Ռոզա Վարդանյան
