23.11.2024 | 15:30
ՄԻՊ-ը փաստաբանական գործունեության հարկման հետ կապված դիմել է ՍԴ
Երթ դեպի Ծիծեռնակաբերդ՝ ի զորակցություն Բաքվի բանտում պահվող հայ գերիների
Հասարակություն
24.04.2024 | 16:26
Արցախի նախկին պետնախարար, Ադրբեջանում գերության մեջ գտնվող Ռուբեն Վարդանյանի ընկերները, գործընկերներն ու համախոհներն այսօր երթով շարժվել են դեպի Ծիծեռնակաբերդ՝ ի զորակցություն Բաքվում գտնվող բոլոր հայ գերիների։
Ցեղասպանության 109-րդ տարելիցի օրը նրանք ոչ միայն հարգանքի տուրք են մատուցել նահատակների հիշատակին, այլև Բաքվին ուղղված պահանջ հղել՝ ազատ արձակել ապրիլի 5-ից հացադուլ հայտարարած Ռուբեն Վարդանյանին և մյուս գերիներին։ Ակցիայի կազմակերպիչ Ռուբեն Հայրապետյանի խոսքով՝ փորձում են աշխարհի ուշադրությունը հրավիրել այն փաստի վրա, որ ցեղասպանությունը շարունակվում է մինչ օրս, Բաքվի բանտերում ունենք ապօրինի պահվող գերիներ, որոնցից մեկը՝ Ռուբեն Վարդանյանը, շուրջ 20 օր է՝ հացադուլի մեջ է:
«Միջազգային իրավապաշտպան կազմակերպությունները պետք է արձագանքեն, գործի դնեն ճնշման մեխանիզմներ, քանի որ ապօրինի ձերբակալված և ավտորիտար երկրում որպես պատանդ պահվող հայ գերիների հարցը նաև քաղաքակիրթ աշխարհի հարցն է: Ռուբեն Վարդանյանը Բաքվի բանտից զանգահարել է ընտանիքի անդամներին և հայտնել, որ միայն ճնշումն են չափում։ Վարդանյանի ընտանիքն ու հարազատներն անհանգստացած են նրա առողջական խնդրով, պահանջում են, որ Կարմիր Խաչի միջազգային կոմիտեն անհապաղ կերպով այցելի նրան: Ամբողջ աշխարհը պետք է միանա, որպեսզի այս խայտառակությանը վերջ դրվի»,-հայտարարեց նա։
Հիշեցնենք, որ 2023 թվականի սեպտեմբերից Բաքվի բանտում պահվող Ռուբեն Վարդանյանը հացադուլ է հայտարարել ապրիլի 5-ից։
Մանյա Պողոսյան
