Քաղաքականություն
24.04.2024 | 21:59
Թուրքիայի քրդամետ DEM (Ժողովուրդների հավասարության ու ժողովրդավարության) կուսակցությունը Հայոց ցեղասպանության 109-րդ տարելիցի կապակցությամբ հայտարարություն է տարածել։
«Պատմական ճշմարտությունների հետ առերեսվելը, տուժած ժողովուրդներից ներողություն խնդրելն ու վերականգնող արդարադատության դիմելն անհրաժեշտ քայլեր են՝ միմյանց և անցյալը հասկանալու, պատմական վերքերն իսկապես բուժելու և ընդհանուր ապագա կառուցելու համար»,- ասվում է հայտարարության մեջ։
Նշվում է, որ այն նաև հասարակության մեջ խղճի և արդարության զգացում զարգացնելու, տառապանքը փոխադարձաբար կիսելու և միասին ժողովրդավարական, խաղաղ և հավասար ապագա կառուցելու ճանապարհն է։
«109 տարի է անցել Մեծ աղետից (Մեծ եղեռնից)՝ էթնիկ ինքնության և հավատքի կոտորածից, որը սկսվել է 1915 թվականի ապրիլի 24-ին, երբ երկու հարյուրից ավելի հայ մտավորականներ տարվեցին իրենց տներից և ուղարկվեցին մահվան երթի: Այս գործընթացը շարունակվեց հարյուր հազարավոր հայերի աքսորով ու սպանություններով։ Այս հողերի մյուս քրիստոնյա ժողովուրդները նույնպես մարդկային ծանր կորուստների գնով են վճարել և կոտորվել այդ քաղաքականության ու գործելակերպի արդյունքում: Մարդկության դեմ հանցագործություններին դիմակայելը կարևոր քայլ է ընդհանուր և հավասար ապագայի և սոցիալական խաղաղության հաստատման գործում»,- նշում է քրդամետ կուսակցությունը։
«Չափազանց կարևոր է այս հողի և աշխարհագրության հնագույն ժողովուրդներից մեկի՝ հայ ժողովրդի և մեր հայ քաղաքացիների հետ խաղաղ և հավասար պայմաններում ապրելը։ Դիվանագիտական, առևտրային, տնտեսական և մշակութային հարաբերությունների զարգացումը Հայաստան պետության հետ, որը նույնպես մեր տարածաշրջանի մաս է կազմում, և՛ ժողովրդի կարիքն ու շահն է, և՛ կովկասյան տարածաշրջանում խաղաղություն հաստատելու միջոց»,- ասվում է DEM կուսակցության հայտարարությունում։
