03.05.2024 | 23:30
Ինչու Էրդողանի Սպիտակ տուն այցը հիմա տեղի չի ունենա. անդրադարձ
Ինժեներական մտածողությունը խնդիրներ լուծելու կարողություն է․ 97 դպրոցականներ մասնակցել են «ԴԻՋԻԿՈԴ 2024»-ի եզրափակիչ փուլին
Հասարակություն
20.04.2024 | 18:41
Հայաստանի ամերիկյան համալսարանում տեղի է ունեցել «ԴԻՋԻԿՈԴ» կիրառական ծրագրավորման պատանեկան 9-րդ մրցույթի հանրապետական եզրափակիչ փուլը․ տեղեկացնում են ՀՀ ԿԳՄՍՆ-ից։
Մրցույթն անցակցվում է ՀՀ ԿԳՄՍ նախարարության և Առաջատար տեխնոլոգիաների ձեռնարկությունների միության համագործակցությամբ։
Ամփոփիչ միջոցառմանը մասնակցել և ներկաներին ողջունել են ՀՀ ԿԳՄՍ նախարարի տեղակալ Արաքսիա Սվաջյանը և ԱՏՁՄ գործադիր տնօրեն Սարգիս Կարապետյանը: Նախարարի տեղակալը շնորհակալություն է հայտնել Առաջատար տեխնոլոգիաների ձեռնարկությունների միությանը նորարար մրցույթներ կազմակերպելու համար, որոնք հնարավորություն են տալիս աշակերտներին ուսումնասիրելու ԲՏՃՄ ոլորտի բոլոր ուղղությունները:
«Մասնակցությունն այսօրինակ միջոցառումներին մեծ փորձառություն է, իսկ այս ընթացքում ձեռք բերված փորձն առաջ շարժվելու, ձեր ապագան կերտելու առումով մեծ օգուտ է բերելու: Հատկապես ԲՏՃՄ առարկաների ուսումնասիությունը անչափ կարևոր է, քանի որ այս բնագավառում փոխկապակցված են դպրոցական և արտադպրոցական բաղադրիչները: Հաճախ ունենում ենք պատկեր, որ մեր երեխաներն արտադպրոցական պարապմունքներն ավելի շատ են սիրում, որովհետև դրանք ավելի հետաքրքիր ձևաչափով են իրականացվում և դրանց մասնակցում են առանց պարտադրանքի՝ իրենց կամքով»:
Նախարարի տեղակալն ապագայում դժվարությունների չբախվելու համար աշակերտներին խորհուրդ է տվել դպրոցում հիմնական՝ բազային առարկաներից զատ՝ ուսումնասիրել լրացուցիչ առարկաներ, որոնք կհամալրեն և կբավարարեն նրանց հետաքրքրությունները. «Վստահ եմ, որ ձեզնից յուրաքանչյուրը հետաքրքրված է ԲՏՃՄ առարկաների ուսումնասիրությամբ. այսօրինակ մրցույթները դեռ ձեր ամենափոքր քայլերն ու հաջողություններն են, միգուցե շատերիդ համար նաև աշխարհընկալման, զարգացման նոր ճանապարհները: Ինժեներական փորձ և մտածողություն ունեցող մարդիկ խնդիրներ լուծելու կարողություն են ձևավորում, իսկ խնդիրները մեր կյանքում անխուսափելի են: Համոզված եմ, որ և՛ «Արմաթ» ինժեներական լաբորատորիաների դասընթացներին, և՛ նմանօրինակ մրցույթներին մասնակցությունը կուղղորդեն ձեզ՝ մասնագիտություն ընտրելու հարցում»:
Միջոցառման մասնակիցներին ողջունել է նաև ԱՏՁՄ գործադիր տնօրեն Սարգիս Կարապետյանը. «Դուք ընտրում եք ճարտարագետ դառնալու ճանապարհը, իսկ ճարտարագետը խնդիրներ լուծող մարդն է։ Խնդիրներ լուծելու համար ձեզ առաջին հերթին պետք են լինելու գիտելիքներ և հմտություններ: «Արմաթ»-ում դուք կրթվում եք նաև որպես հայ ճարտարագետ, որը պետք է լուծի ինչպես իր երկրի, այնպես էլ հետագայում նաև մոլորակի խնդիրները, իսկ խնդիրները լուծելու ամենահիմնարար ուղին կրթությունն է»:
Արդեն 9-րդ տարին անցկացվող մրցույթի հիմնական նպատակն է խրախուսել և զարգացնել դպրոցականների ալգորիթմական մտածողությունը, աշակերտներին խաղ սպառողից վերածել խաղ ստեղծողի, բացահայտել ակտիվություն ցուցաբերած դպրոցներին և տաղանդավոր պատանիներին՝ նրանց հնարավորություն տալով զարգացնելու ստեղծագործական ունակությունները:
«ԴԻՋԻԿՈԴ»-ը միաժամանակ արդյունավետ հարթակ է, որտեղ ՀՀ բոլոր մարզերի դպրոցականները հանդիպում են միմյանց, կիսվում գիտելիքներով և նորարար գաղափարներով:
Այս տարի «ԴԻՋԻԿՈԴ 2024»-ին մասնակցության հայտ են ներկայացրել 1300-ից ավելի աշակերտներ ինչպես Հայաստանի բոլոր մարզերից ու Երևանից, այնպես էլ Ջավախքից ու արտերկրից։
Մրցույթն անցկացվել է երեք փուլերով՝ նախամարզային, մարզային և հանրապետական: Եզրափակիչ՝ հանրապետական փուլին մրցել են 97 մասնակիցներ՝ 88 թիմով: Եզրափակիչ փուլի ընթացքում մասնակիցները համակարգչային խաղ, վիրտուալ աշխատանոց, սարքերի ինտեգրում անվանակարգերով ներկայացրել են իրենց ստեղծած խաղերը։ Անցկացվել է նաև օլիմպիադա՝ «Կրիայ» և «Փայթն» ծրագրավորման երկու լեզուներով։
Ժյուրիի կազմում ընդգրկված են եղել ԿԳՄՍ նախարարության հանրակրթության վարչության պետ Թամարա Սարգսյանը, ներկայացուցիչներ ԲՏԱ նախարարությունից ու «ARLOOPA», «STEMAR», «RELCU», «ARDESK» ընկերություններից։
Նշենք նաև, որ մրցույթի կազմակերպման գործընկերն է Հայաստանում ամերիկյան համալսարանը։
