20.06.2026 | 23:35
ԱԱ-2026. Նիդերլանդները 5 գոլ խփեց Շվեդիային. ՏԵՍԱՆՅՈՒԹ
Ադրբեջանում 44-օրյա պատերազմի ևս մեկ մասնակից է ինքնասպան եղել
Քաղաքականություն
19.04.2024 | 22:16
Արցախյան 44-օրյա պատերազմի մասնակից ադրբեջանցիների շրջանում ինքնասպանությունները շարունակվում են։ Տեղական լրատվամիջոցները հաղորդում են, որ Մինգեչաուրում ապրիլի 17-ին վարձակալած տանը հայտնաբերվել է 1997 թվականին ծնված Միրջավադ Հաջիևի մարմինը։
«Տեղեկություն ստացանք, որ մեր զինծառայող Միրջավադ Հաջիևը մահացել է։ Առավոտյան նրան գտել են իր վարձակալած տանը կախված վիճակում։ Մենք մասնակցեցինք հանգուցյալի հուղարկավորությանը։ Ինքնասպանության պատճառը հայտնի չէ։ Դատախազությունը քննություն է իրականացնում, հավանաբար, մանրամասները կհայտնեն։ Միրջավադ Հաջիևն ամուսնացած էր, որքան գիտեմ՝ ուներ երկու երեխա։ Նա ընտանիքի հետ ապրում էր առանձին վարձով»,- ասել է Մինգեչաուրի շրջանի գործադիր իշխանության պատերազմի մասնակիցների և զոհերի ընտանիքների հետ աշխատանքների կազմակերպման բաժնի խորհրդական Սեյմուր Հիդայաթովը։
Դեպքի առթիվ տարվում է քննություն։
Ապրիլի սկզբին էլ ադրբեջանական լրատվամիջոցները հայտնել էին 44-օրյա պատերազմի մեկ այլ մասնակցի՝ Աստարայի շրջանի Շուվի գյուղի բնակիչ Վուգար Ռուստամովի ինքնասպանության մասին։ Տեղեկությունների համաձայն՝ ինքնասպանության պատճառը պատերազմից հետո հոգեբանական խնդիրներն են։ Նախկինում ևս նա ինքնասպանության փորձ արել է։
Արցախյան պատերազմի ադրբեջանցի մասնակիցների շրջանում ինքնասպանության դեպքերի թիվը, ըստ տարբեր տեղեկությունների, գերազանցում է 80-ը։
Էմմա Չոբանյան
