23.11.2024 | 12:56
Երկրաշարժ Ադրբեջանում․ այն զգացվել է նաև Սյունիքի մարզում՝ 3-4 բալ ուժգնությամբ
Անկարայի ու ԵՄ-ի հարաբերությունները Կիպրոսի հետ կապելն անընդունելի է․ Թուրքիայի ԱԳՆ
Քաղաքականություն
19.04.2024 | 17:31
Անկարան երբեք չի ընդունի այնպիսի մոտեցում, որը Թուրքիա-ԵՄ հարաբերություններում առաջընթացը կապում է Կիպրոսի խնդրի հետ։ Այս մասին ասվում է ապրիլի 17-18-ը Բրյուսելում կայացած Եվրոպական խորհրդի հատուկ նիստի արդյունքների վերաբերյալ Թուրքիայի ԱԳՆ-ի հայտարարության մեջ։
«Կիպրոսի հարցը Թուրքիայի և ԵՄ-ի հարաբերություններում առաջընթացի հետ կապելը երբեք չի ընդունվի մեր կողմից։ Պետք է հրաժարվել այն մոտեցումից, որը նվազեցնում է Թուրքիայի և ԵՄ-ի բազմակողմ հարաբերությունները Կիպրոսի հարցում։ Այս մտածելակերպը չի կարող դրական և կառուցողական ներդրում ունենալ Կիպրոսի խնդրի կամ տարածաշրջանային ու գլոբալ այլ խնդիրների լուծման գործում»,- ասվում է հայտարարության մեջ։
Նշվում է, որ Թուրքիայի վերաբերյալ հանդիպման ժամանակ ընդունված որոշումներն Անկարայի և համաշխարհային իրադարձությունների վերաբերյալ ԵՄ-ի ռազմավարական տեսլականի բացակայության ևս մեկ օրինակ են։
Թուրքիայի ԱԳՆ-ն «լրջագույն անհետևողականություն է անվանել փաստը, որ գագաթնաժողովում կոնկրետ որոշում չի եղել Եվրոպական դիվանագիտության ղեկավար Ժոզեպ Բորելի և Եվրոպական հանձնաժողովի կողմից պատրաստված ԵՄ-Թուրքիա հարաբերությունների վերաբերյալ համատեղ հայտարարության առաջարկությունների վերաբերյալ։
Անկարան, միաժամանակ, հայտարարում է, որ որպես թեկնածու երկիր՝ շարունակում է վճռական մնալ ԵՄ-ին անդամակցելու հարցում։
«Այնուամենայնիվ, մենք մերժում ենք մեր համագործակցության ընտրովի սահմանափակումը որոշակի ոլորտներով։ ԵՄ-ի հետ մեր երկխոսությունը կքննարկենք փոխադարձության շրջանակում՝ համաձայն առաջիկա ժամանակահատվածում ԵՄ-ի կողմից Թուրքիայի նկատմամբ իրականացվող քայլերի արագության, մակարդակի և ծավալի»,- ասվում է հայտարարության մեջ։
Հիշեցնենք, որ նիստի արդյունքներով տարածված հայտարարության մեջ ԵՄ-Թուրքիա համագործակցությունն է՛լ ավելի ընդլայնելու նպատակով ԵՄ ղեկավարներն ընդգծել էին Կիպրոսի խնդրի կարգավորման հարցով բանակցությունների վերսկսման և առաջընթացի կարևորությունը։
