ԵՄ-ն հայտարարել է, որ Թուրքիայի հետ համագործակցության ընդլայնման կարևոր պայման է Կիպրոսի հարցով բանակցությունների վերսկսումը

Եվրոպական խորհուրդը ռազմավարական քննարկում է անցկացրել ԵՄ-Թուրքիա հարաբերությունների վերաբերյալ՝ ի գիտություն ընդունելով Բարձր ներկայացուցիչ Ժոզեպ Բորելի և հանձնաժողովի համատեղ հաղորդագրությունը ԵՄ-Թուրքիա քաղաքական, տնտեսական և առևտրային հարաբերությունների վիճակի վերաբերյալ։ Այս մասին ասվում է ԵՄ անդամ երկրների առաջնորդների՝ նախօրեին տեղի ունեցած գագաթնաժողովի արդյունքներով ընդունված հայտարարությունում։

Փաստաթղթում ասվում է, որ Եվրամիությունը ռազմավարական շահ ունի Արևելյան Միջերկրական ծովում կայուն և անվտանգ միջավայրի, ինչպես նաև Թուրքիայի հետ համագործակցության և փոխշահավետ հարաբերությունների զարգացման մեջ: Այս համատեքստում ԵՄ առաջնորդները հանձնարարել են անդամ երկրների դեսպաններին, հարգելով համապատասխան ինստիտուտների իրավասությունները՝ առաջ մղել աշխատանքը զեկույցի վերաբերյալ և ընդգծել, որ Թուրքիայի սեփական կառուցողական ներգրավվածությունը կարևոր նշանակություն կունենա համագործակցության ոլորտները զարգացնելու համար։

ԵՄ-Թուրքիա համագործակցությունն է՛լ ավելի ընդլայնելու նպատակով ԵՄ ղեկավարներն ընդգծել են Կիպրոսի խնդրի կարգավորման հարցով բանակցությունների վերսկսման և առաջընթացի կարևորությունը։

Հիշեցնելով նախորդ եզրակացությունները՝ Եվրոպական խորհուրդը լիովին հավատարիմ է մնում Կիպրոսի խնդրի համապարփակ կարգավորմանը ՄԱԿ-ի շրջանակում՝ համաձայն ՄԱԿ-ի ԱԽ համապատասխան բանաձևերի և այն սկզբունքների, որոնց վրա հիմնված է Միությունը և օրենսդրությունը:

Եվրոպական խորհուրդը նաև ողջունում է Մարիա Անգելա Հոլգին Կուելյարի նշանակումը Կիպրոսի հարցով ՄԱԿ-ի գլխավոր քարտուղարի անձնական ներկայացուցչի պաշտոնում։

«Եվրամիությունը պատրաստ է ակտիվ դերակատարություն ունենալ ՄԱԿ-ի գլխավորած գործընթացի բոլոր փուլերին աջակցելու գործում՝ իր տրամադրության տակ գտնվող բոլոր համապատասխան միջոցներով»,- ասվում է փաստաթղթում։