23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Խոշտանգման և բռնության զուգահեռ իրականությունը․ ՀՀ-ում նշում են Ոստիկանի օրը. ՏԵՍԱՆՅՈՒԹ
Քաղաքականություն
16.04.2024 | 20:32
Այսօր տեսանյութ է նկարահանվել, որտեղ երևում է, թե ինչպես է ոստիկանն Աբովյան փողոցը հատում չթույլատրված հատվածով։ Եվ հենց այսօր ոստիկանները նշում են իրենց մասնագիտական տոնը։ Գուցե, վարչական իրավախախտում թույլ տվող ոստիկանը մտածում է՝ այսօր իրենց կարելի՞ է։ Սակայն իրավապաշտպաններն ավելի լուրջ խախտումների մասին ահազանգում են նաև ոստիկանների համար ոչ տոնական օրերին։
Դա, սակայն, ՀՀ ոստիկանապետ Վահե Ղազարյանին չի խանգարում մասնագիտական տոնի կապացկությամբ շնորհավորական ուղերձում վստահ հայտարարել՝ ոստիկանությունը միշտ քաղաքացու իրավունքների պաշտպանության, հասարակական կարգի ապահովման և հանցավորության դեմ պայքարի առաջնագծում է։
«Պետության դիմագծի՝ Ներքին գործերի նախարարությանն առնչվող պատասխանատու ծավալում միանշանակ կարող ենք արձանագրել էական բարեփոխումներ։ Եվ սա միայն մեր գնահատականը չէ. սա հանրության անկախ կարծիքի, միջազգային գործընկերների փորձագիտական կարծիքի վրա հիմնված մոտեցում է։ Սա ՀՀ Վարչապետի, Կառավարության բարձր հովանու, միջազգային գործընկերների կայուն աջակցության, ամենօրյա սերտ համագործակցության, հանրության վստահության, ինչպես նաև բարեփոխումների իրականացման հարցում Ներքին գործերի նախարարության կամքի, վճռականության և ամենօրյա սրտացավ աշխատանքի արդյունքն է»,- իր ելույթում նշել է ՆԳ նախարարը։
2022 թվականին սեպտեմբերի 16-ին Ռուսաստանի դեսպանատան մոտից խաղաղ ակցիա իրականացնելու ընթացքում բերման ենթարկված իրավապաշտպան Արման Ղարիբյանի համար Ղազարյանի նմանօրինակ հայտարարություններն առնվազն հասկանալի չեն։ Նրա հիշողություններում այսօր էլ թարմ է իրեն բերման ենթարկելու անհիմն գործողությունները։ Սեպտեմբերի 16-ին, երբ Ադրբեջանը հերթական սադրանքն էր իրականացրել ՀՀ ինքնիշխան տարածքի նկատմամբ, մի խումբ քաղաքացիներ խաղաղ հավաք նախաձեռնեցին՝ իրենց բողոքի ձայնը բարձրացնելով ՌԴ անտարբերության ու չեզոքության դեմ։
Այսօրվա խորհրդանշական տոնի հերոսների ոչ հերոսական գործողություններից շաբաթներ առաջ ևս մի քաղաքացի էր տուժել։ Վահե Նավոյանի նկատմամբ ոստիկանության ծառայողները ֆիզիկական և հոգեբանական բռնություն էին գործադրել, հարվածներ հասցրել նրան, քաշքշել և սպառնացել։
Խոշտանգման և դաժան վերաբերմունքի նմանօրինակ դեպքերը բազմաթիվ են։ Ըստ «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանի՝ հենց դրա հետևանքով քաղաքացիները որոշ դեպքերում խուսափում են դիմել իրավապահ մարմիններին։
Կազմակերպությունն օրերս ներկայացրեց հանրության կողմից՝ իրավապահ համակարգի գործունեության ընկալման և վերաբերմունքի մասին հարցումների տվյալները․ քաղաքացիները, որևէ հանցագործության տուժող կամ ականատես լինելու դեպքում այնքան էլ հակված չեն այդ մասին իրավապահներին հայտնել։
Այս համատեքստում ուշագրավ է վարչապետ Նիկոլ Փաշինյանի այսօրվա ելույթը՝ Ոստիկանության 106-րդ տարեդարձին նվիրված կոլեգիայի հանդիսավոր նիստին, որի ընթացքում Փաշինյանը վստահ հայտարարել է՝ ոստիկանությունը պաշտպանում է և պահպանում քաղաքացու ազատության սահմանները:
«Ընդ որում, Ոստիկանությունը քաղաքացու ազատության և իրավունքների սահմանները պահպանում է երկու կողմից: Առաջինը, Ոստիկանությունը պետք է հոգ տանի, որպեսզի ոչ ոք չխախտի և չներխուժի, այսինքն՝ քաղաքացու ազատության և իրավունքի սահմանը չներխուժի ուրիշի ազատության և իրավունքի տարածք, և միևնույն ժամանակ քաղաքացին ինքը չխախտի իր ազատության և իրավունքների սահմանը ու ներխուժի ուրիշի իրավունքների և ազատության տարածք»։
Վարչապետն ապրում է իրավապահների կողմից խոշտանգումներից և բռնություններից զե՞րծ Հայաստանում, թե՞ նրա ընկեր նախարար Վահե Ղազարյանն է այդպես զեկուցում։
Փաստ է, որ ոստիկանների կողմից ոչ իրավաչափ և առերևույթ ապօրինի գործողությունները շատ հաճախ անպատիժ են մնում, ինչը, իրավապաշտպանների պնդմամբ՝ ծնում է նոր հանցագործությունները։
2015 թվականից խոշտանգման հոդվածի ուժի մեջ մտնելուց մինչ օրս՝ 9 տարվա ընթացքում, այս հոդվածով ընդամենը մեկ դատավճիռ է օրինական ուժ ստացել։
Մանրամասները՝ տեսանյութում։
Ռոզա Վարդանյան
