12.12.2024 | 14:33
Բացվել է «Երեկ և այսоր. Ժակ դը Մորգանի հետքերով» հայ-ֆրանսիական միջազգային ցուցահանդեսը
Meta-ն Թուրքիայում ժամանակավորապես փակում է Threads-ը թուրքական իշխանությունների հրահանգով
Քաղաքականություն
17.04.2024 | 22:47
Meta-ն հայտնել է, որ ապրիլի 29-ից իր Threads սոցիալական մեդիա հարթակը ժամանակավորապես կփակի Թուրքիայում՝ թուրքական մրցակցային մարմնի միջանկյալ հրամանի համաձայն։ Նշվում է, որ սա չի ազդի Թուրքիայում Meta-ի մյուս ծառայությունների, ներառյալ՝ Facebook, Instagram, WhatsApp սոցիալական հարթակների վրա, գրում են թուրքական լրատվամիջոցները։
Ընկերությունը հայտնում է, որ Threads-ի օգտատերերը Թուրքիայում կկարողանան ապակտիվացնել կամ ջնջել իրենց հաշիվները, ինչպես նաև ներբեռնել իրենց սեփական բովանդակությունը։
Փակման ընթացքում ապակտիվացված օգտահաշիվների գրառումներն ու փոխազդեցությունները կրկին տեսանելի կդառնան, եթե երկրում վերականգնվի Threads-ի հասանելիությունը։ Դեռևս պարզ չէ, թե արդյոք հարթակը կրկին հասանելի կդառնա Թուրքիայում:
Այս հայտարարությունը հետևում է անցյալ ամիս Թուրքիայի մրցակցության խորհրդի որոշմանը, որ Meta-ն խախտել է երկրի հակամենաշնորհային օրենքները՝ չարաշահելով իր գերիշխող դիրքը շուկայում և չխնդրելով օգտատերերից թույլտվություն՝ Instagram-ի և Threads-ի միջև միջպլատֆորմային տվյալների փոխանակման համար:
Meta-ի հայտարարության մեջ ասվում է, որ համաձայն չէ միջանկյալ որոշման հետ և բողոքարկելու է այն։
«Մենք կարծում ենք, որ համապատասխանում ենք Թուրքիայում գործող բոլոր իրավական պահանջներին»,- ասվում է հայտարարության մեջ։
Ընկերությունը համագործակցելու է մրցակցային մարմնի հետ՝ «հույս ունենալով» վերագործարկել Threads-ը Թուրքիայում:
