22.07.2026 | 15:18
ՌԴ-ն հրթիռներով և ավելի քան 200 ԱԹՍ-ներով գրոհել է Ուկրաինան․ տուժածներ կան
Լարված իրավիճակ Վրաստանի խորհրդարանի մոտ. կան բերման ենթարկվածներ
Քաղաքականություն
15.04.2024 | 23:17
Վրաստանի խորհրդարանի իրավական հարցերի հանձնաժողովը Ռուսթավելիի պողոտայում ընթացող բազմահազարանոց բողոքի ցույցին զուգահեռ առաջին ընթերցմամբ հավանություն տվեց «Օտարերկրյա ազդեցության թափանցիկության մասին» օրենքին, որը ստացել է «ռուսական օրենք» անվանումը։ Այս մասին տեղեկացնում է «Ալիք մեդիան»։
Բուռն բանավեճից հետո իրավական հանձնաժողովը կողմ քվեարկեց «ռուսական օրենքի» նախագծին։ Այն առաջին ընթերցմամբ մեծամասնությունը նախատեսում է ընդունել վաղը՝ ապրիլի 16-ի լիագումար նիստում։
Հանձնաժողովի նիստը մեկնարկել էր առավոտյան ժամը 10-ից՝ բողոքի ցույցերի, աղմուկի և բուռն հակասությունների ֆոնին։ Խորհրդարանում նաև ծեծկռտուք է տեղի ունեցել: Ընդդիմադիր պատգամավոր Ալեկո Էլիսաշվիլին բռունցքով հարվածել է Մամուկա Մդինարաձեին, հայհոյել և ռուս անվանել նրան, ինչից հետո դահլիճում իրավիճակն անկառավարելի էր դարձել, «Վրացական երազանք»-ի անդամներն էլ հարձակվել են Էլիսաշվիլիի վրա։
Բացի այդ, կոմիտեի նախագահ Անրի Օխանաշվիլին նիստից հեռացրել է բոլորին, ովքեր օրենքը ռուսական են անվանել:
Խորհրդարանի շենքի մոտ, որտեղ ցույցը շարունակվում է, հատուկ ջոկատայիններ են մոբիլիզացված, կա նաև ջրցան մեքենա։ Ոստիկաններն ու հատուկ ջոկատայինները փակել են դեպի խորհրդարանի շենքի մուտք տանող ճանապարհները։
Ոստիկաններն ու հատուկ ջոկատայինները բերման են ենթարկում խորհրդարանի շենքի մոտ «ռուսական օրենքի» դեմ բողոքի խաղաղ ցույց անցկացնող քաղաքացիներին։
