Հայկական ընկերությունները ինչպես կարող են խուսափել ամերիկյան պատժամիջոցներից․ Արա Պապյան. ՏԵՍԱՆՅՈՒԹ

«Մոդուս վիվենդի» կենտրոնի նախագահ Արա Պապյանի փոխանցմամբ՝ Իրանը մշտապես գտնվել է պատժամիջոցների տակ, ԱՄՆ-ի տարածաշրջանային շահերից է բխում նաև այդ պատժամիջոցների կիրառումը, սակայն պետք է հիշել, որ ԱՄՆ-ը յուրաքանչյուր դեպքի համար առանձնահատուկ քաղաքականություն է մշակում, հետևաբար, հաշվի առնելով ՀՀ-Իրան տնտեսական հարաբերությունները և մեր առևտրաշրջանառության փոքր ծավալը, չի կարծում, որ այդ պատժամիջոցները կարող են լրջագույն հարված հասցնել ՀՀ տնտեսությանը, քանի որ ԱՄՆ-ը առավել ուշադիր  է և կոչ է անում նախապես խորհրդակցել իր հետ, որպեսզի չհայտնվենք այդ պատժամիջոցների տակ։

Այս մասին այսօր լրագրողների հետ հանդիպման ժամանակ ասաց «Մոդուս վիվենդի» կենտրոնի նախագահ Արա Պապյանը՝ անդրադառնալով ԱՄՆ-ի կողմից Իրանի նկատմամբ կիրառված պատժամիջոցներին և դրանց բացասական ազդեցությանը՝ հայ-իրանական տնտեսական համագործակցության վրա։ 

Վերջինս նկատում է, որ ԱՄՆ-ի՝ տնտեսական համագործակցություն սկսելու համար դեսպանատների հետ խորհրդակցելու նոր պահանջը դրական է, քանի որ դեսպանատներն առավել իրազեկված են և զերծ կպահեն  մեր ընկերություններին հետագայում ամերիկյան ընկերությունների հետ խնդիրներ ունենալու վտանգից։

Ասուլիսին մասնակից քաղաքագետ Ստեփան Գրիգորյանն էլ նկատեց, որ նախքան պատժամիջոցների՝ մեր տնտեսության վրա հնարավոր բացասական ազդեցության մասին խոսելը, պետք է հիշել այս հարցում Եվրամիության դիրքորոշումը։ «Պետք չէ մոռանալ ԵՄ դիրքորոշումն Իրանի հարցում։ ԵՄ-ն շատ կոշտ է արձագանքել ԱՄՆ-ին և նշել, որ Իրանի հետ շարունակելու է աշխատել»,- ասաց Ստեփան Գրիգորյանը։  

Մանրամասները՝ տեսանյութում։