29.05.2026 | 23:37
Երևանում կկայանա «Rise» ռազմարդյունաբերական ցուցահանդեսը. կներկայացվեն նախկինում երբևէ չցուցադրված նմուշներ
Հեյդար Ալիևի արձանին «Ստալին» գրելու համար Ադրբեջանում ընդդիմադիր ակտիվիստը 6 տարվա ազատազրկման է դատապարտվել
Քաղաքականություն
09.04.2024 | 16:39
Բաքվի ծանր հանցագործությունների դատարանը 6 տարի ժամկետով ազատազրկման է դատապարտել ընդդիմադիր Ադրբեջանի Ժողովրդական ճակատ կուսակցության ակտիվիստ Էլբեյ Քերիմլիին։ Նա մեղավոր է ճանաչվել առանձնապես խոշոր չափերով թմրամիջոցների ապօրինի շրջանառության մեջ։ Լրատվամիջոցների հետ զրույցում ակտիվստի փաստաբան Նեյմատ Քերիմովը հայտարարել է, որ դատավճիռը բողոքարկվելու է։
Դատարանում Էլբեյ Քերիմլին չի ընդունել մեղադրանքը և հայտարարել է, որ այն հորինված է քաղաքական դրդապատճառներով։ Նա ասել է, որ իր ձերբակալության իրական պատճառն անցյալ տարվա օգոստոսին երկրի նախկին նախագահ, գործող ղեկավար Իլհամ Ալիևի հոր՝ Հեյդար Ալիևի հուշարձանի վրա «Ստալին» բառը գրելն է։ Դրանից հետո նրան անմիջապես բերման են ենթարկել։ Քերիմլիի խոսքով՝ ոստիկանական բաժանմունքում իրեն ստիպել են խոշտանգումների տակ ինքնախոստովանական ցուցմունք տալ։
«Բաժանմունքում հարցաքննությունից հետո իմ դիմաց թմրանյութ ու զենք դրեցին, որ կարողանամ ընտրել։ Զգուշացրել են, որ հակառակ դեպքում ավելի վատ կլինի։ Նրանք ասացին, որ իմ բջջային հեռախոսում ներբեռնելու են ռազմական օբյեկտների լուսանկարներ և ինձ մեղադրելու են Հայաստան և Իրան գաղտնի ռազմական տեղեկատվություն ուղարկելու մեջ»,- պատմել է ընդդիմադիր ակտիվիստը։
Փաստաբանն էլ հայտարարում է, որ գործով օբյեկտիվ հետաքննություն չի իրականացվել։
«Իրականում Էլբեյ Քերիմլին դատապարտվել է նրան բերման ենթարկած ոստիկանների ցուցմունքների հիման վրա։ Երիտասարդը հայտարարել է, որ խոստովանել է ոստիկանների ճնշման տակ, բայց դատարանը սա անտեսում է»,- նշել է նա։
Ադրբեջանի Ժողովրդական ճակատ կուսակցության ղեկավար Ալի Քերիմլին էլ ասել է, որ Հեյդար Ալիևի հուշարձանի վրա «Ստալին» գրած երիտասարդի խիստ պատիժը ցույց է տալիս մի կողմից քաղաքական ռեժիմի դաժանությունն ու վախը, մյուս կողմից՝ երկրի կառավարողների մոտ տրամաբանության բացակայությունը։
Հավելենք, որ Ադրբեջանի իշխանությունները վերջին շրջանում բռնաճնշումների նոր ալիք են սկսել անկախ ու ընդդիմադիր լրագրողների, գործիչների նկատմամբ։ Նախորդ տարվա նոյեմբերից Ադրբեջանում շուրջ երկու տասնյակ լրագրողներ, հասարակական գործիչներ են ձերբակալվել։ Միջազգային կառույցներն ու իրավապաշտպանները կոչ են անում իշխանություններին ազատ արձակել նրանց։
Էմմա Չոբանյան
