Հետընտրական ժամանակահատվածում ԿԸՀ-ի նկատմամբ հանրային վստահությունը էականորեն փոխվել է. Տիգրան Մուկուչյան

ՀՀ Ազգային ժողովի ընտրություններն անցել են Ընտրական օրենսգրքի պահանջների պահպանմամբ, հակառակ դեպքում խորհրդարանի ամբիոնից կհնչեին առարկայական ելույթներ՝ կոնկրետ հանգամանքներով ու փաստերով: Այս մասին խորհրդարանում լրագրողների հետ զրույցում հայտարարեց Կենտրոնական ընտրական հանձնաժողովի նախագահ Տիգրան Մուկուչյանն՝ անդրադառնալով «Կենտրոնական ընտրական հանձնաժողովի գործունեության մասին» հաղորդման ներկայացման ընթացքում ընդդիմադիր պատգամավորների հնչեցրած քննադատություններին: Մուկուչյանը կարծում է, որ իր ղեկավարած կառույցը վայելում է հանրության վստահությունը: «Եթե հետընտրական ժամանակահատվածը անկեղծ և անկողմնակալ գնահատման առարկա դառնա, ապա ես կարծում եմ, որ հանրային ընկալումը, հանրային վստահությունը էականորեն փոխվել է»,- նշեց Մուչյանը:

Հիշեցնենք՝ մոտ մեկ ամիս առաջ Եվրամիության դեսպան Պյոտր Սվիտալսկին հայտարարել էր, որ ԿԸՀ-ն ավելի արժանահավատ և հանրային վստահությունը վայելող կառույց դառնալու համար պետք է իր կազմում ներգրավվի քաղհասարակության ներկայացուցիչների: Մուկուչյանը, մինչդեռ , չի պատկերացնում, թե ինչպես պետք է քաղհասարակությունից ներկայացուցիչ ընտրվի:

«Մենք այսօր ականատես ենք լինում, որ անգամ դիտորդական առաքելություն իրականացրած մի քանի հասարակական կազմակերպություններ, որոնք Ազգային ժողովի ընտրությունների ժամանակ հանդես էին գալիս մեկ անվան ներքո, Երևանի ավագանու ընտրությունների ժամանակ ներկայացրեցին հայտարարություն, որով մյուս երկուսը չէին լիազորում երրորդին օգտագործել այն անվանումը, որով հանդես էին գալիս և այլն»,- նկատեց ԿԸՀ նախագահը։

Մանրամասները՝ տեսանյութում:

Շողիկ Գալստյան