17.03.2026 | 15:09
Սթափության զննություն չանցնելու համար փորձել էր կաշառել պարեկներին. վարորդը ձերբակալվել է
Մասիսի քաղաքապետի դեմ ցուցմունք տված անձինք առերեսման ժամանակ հրաժարվում են իրենց ցուցմունքներից. փաստաբան
Հասարակություն
21.08.2018 | 16:27
Մասիսի անազատության մեջ գտնվող քաղաքապետ Դավիթ Համբարձումյանի պաշտպանները կդիմեն Վերաքննիչ դատարան Համբարձումյանի նկատմամբ կալանքը որպես խափանման միջոց կիրառելու և գրավով ազատ արձակումը մերժելու Առաջին ատյանի դատարանի որոշման դեմ: Այս մասին Factor.am-ին ասաց Համբարձումյանի պաշտպան Տիգրան Աթանեսյանը:
Պաշտանը նաև հավելեց, որ մեղադրանքի կողմը խախտում է օրենքը. «Կոպիտ կերպով խախտում են օրենքը, չունեն որևէ ապացույց Դավիթի դեմ, այն անձինք, ում ցուցմունքները դրել են լրացուցիչ մեղադրանքի հիմքում, առերեսման ժամանակ հրաժարվում են իրենց ցուցմունքներից: Առերեսման ժամանակ նրանք պնդում են, որ Դավիթին չեն տեսել կամ, որ նա որևէ գործողություն չի արել»:
Աթանեսյանն ասաց, որ առերեսումները ձգձգվում են, իսկ դրանց ընթացքում պաշտպանական կողմի հարցերին թույլ չեն տալիս, որ վկաները պատասխանեն. «Խայտառակ վիճակ է, ակնհայտ անմեղ անձին անազատության մեջ են պահում, դատարաններին ներկայացնում ենք բոլոր ապացույցները, բայց այս պահին դեռ ապարդյուն»:
Հիշեցնենք, որ Դավիթ Համբարձումյանը կալանավորվել է հուլիսի 6-ին: Մասիսի քաղաքապետին մեղադրանք է առաջադրվել Երևանի Էրեբունի թաղամասում ապրիլի 22-ին տեղի ունեցած անկարգությունների գործով, ինչպես նաև լրացուցիչ մեղադրանք Արարատի մարզի Հայանիստ և Հովտաշատ գյուղերի խաչմերուկում տեղի ունեցած միջադեպի գործով:
Լիլիթ Շաբոյան
