ՌԴ-ն ԱԹՍ-ներով հարվածներ է հասցրել Խարկովին և Զապորոժիեին․ կան տուժածներ

Ռուս զինվորականները մարտի 28-ի գիշերը անօդաչու սարքերով հարվածել են Ուկրաինայի տարածքին, պայթյուններ են լսվել Խարկովում և Զապորոժիեում։ Կան տուժածներ, հայտնում են տեղի իշխանությունները։ Պայթյունները Խարկովում տեղի են ունեցել կեսգիշերին մոտ։ Քաղաքապետ Իգոր Տերեխովը հայտնել է, որ Խարկովի Կիևյան շրջանը ենթարկվել է հարձակման։

Ժամը 01:58-ին Զապորոժիեի պայթյունների մասին հայտնել է Զապորոժիեի շրջանային ռազմական վարչակազմի ղեկավար Իվան Ֆեդորովը։ «Հակառակորդը անօդաչու սարքերով հարվածներ է հասցրել Զապորոժիեի մասնավոր տներին, կան զոհեր»,- ասվում է հաղորդագրության մեջ։

Ավելի ուշ Զապորոժիեի քաղաքային խորհրդի քարտուղար Անատոլի Կուրտևը պարզաբանել է, որ քաղաքի երեք թաղամասերում «Շահեդների» գրոհի ժամանակ ավերվել և վնասվել են տասնյակ առանձնատներ, երկու մարդ վիրավորվել է։

«Հարձակման հետևանքով քաղաքի երեք թաղամասերում տուժել են մասնավոր հատվածի տներ: Այս պահին հայտնի է, որ հինգ տուն խարխլվել է, ևս 40-ը՝ վնասվել»,- գրել է Կուրտևը։

Տելեգրամ-ալիքները հաղորդում են նաև մեկ անօդաչու թռչող սարքի հարձակման մասին՝ Օդեսայի վրա, իսկ մյուսը՝ Կրիվոյ Ռոգ շրջանում:

Մարտի 28-ի առավոտյան Ուկրաինայի ռազմաօդային ուժերը հայտնել են, որ իրենց հաջողվել է խոցել Ռուսաստանի կողմից արձակված 28 անօդաչու թռչող սարքերից 26-ը։ Ըստ ուկրաինացի զինվորականների՝ ռուսական բանակը Ուկրաինայի ուղղությամբ հարվածներ է հասցրել նաև երեք թևավոր X-22 հրթիռով, X-31Պ հակառադարային հրթիռով և С-300 զենիթահրթիռային համակարգով։ Ռազմաօդային ուժերի հաղորդագրությունում չի նշվում՝ արդյո՞ք դրանք խոցվել են:
Օդեսայում, ըստ ուկրաինացի զինվորականների, «Շահեդներ»-ի հարձակում է իրականացվել էներգետիկ օբյեկտի վրա, սակայն ԱԹՍ-ները ոչնչացվել են։