25.06.2026 | 13:56
Հրապարակվել է բասկետբոլի Հայաստանի Մ16 հավաքականի հայտացուցակը՝ Երևանում կայանալիք Եվրոպայի C դիվիզիոնի մրցաշարում
ԱՄՆ արդարադատության նախարարությունը Apple-ին մեղադրել է սմարթֆոնների շուկան մենաշնորհայնացնելու մեջ
Քաղաքականություն
22.03.2024 | 21:57
ԱՄՆ արդարադատության նախարարությունը և երկրի 16 նահանգների գլխավոր դատախազները հայց են ներկայացրել Apple Inc.-ի դեմ՝ նրան մեղադրելով սմարթֆոնների շուկան մենաշնորհայնացնելու մեջ։ Apple-ի սահմանափակող գործողություններն «ամերիկացիների համար դժվարացնում են նոր սմարթֆոնների անցնելը (այլ արտադրողներից – խմբ.), խաթարում են հավելվածների, ապրանքների և ծառայությունների նորարարությունը և զգալի ծախսեր են առաջացնում մշակողների, բիզնեսի և սպառողների վրա», ասվում է տարածված հաղորդագրությունում:
Մասնավորապես, Apple-ին մեղադրանք է ներկայացվել, որ ընկերությունը, ի թիվս այլ բաների, արգելափակում է հարուստ ֆունկցիոնալությամբ հավելվածները, որոնք թույլ կտան օգտվողներին ավելի հեշտությամբ անցնել սմարթֆոնների տարբեր հարթակներ: Բացի այդ, դեպարտամենտի հայցում ասվում է, որ Apple-ը սահմանափակում է հավելվածների և ամպային հոսքային ծառայությունների զարգացումը, որոնք հնարավորություն են տալիս «վայելել բարձրորակ տեսախաղեր և ամպի վրա հիմնված այլ հավելվածներ՝ առանց սմարթֆոնների թանկարժեք սարքավորումների համար վճարելու»:
Ընկերությունը նաև միտումնավոր սահմանափակում է իր մեսենջերի ֆունկցիոնալությունը այլ արտադրողների սարքերի վրա։ Ըստ Գլխավոր դատախազության՝ Apple Watch-ի ֆունկցիոնալությունը ևս սահմանափակվում է, եթե այն միացված է այլ արտադրողների սմարթֆոններին:
Apple-ը, մեկնաբանելով նախարարության հայցը, ասել է, որ այն բավարարելու դեպքում կխաթարվի Apple-ի կարողությունը՝ «ստեղծելու այն տեխնոլոգիաները, որոնք մարդիկ ակնկալում են իրենից, որոնցում սարքավորումներն ու ծրագրակազմը, ինչպես նաև ծառայությունները փոխկապակցված են»:
