Ստամբուլի ընդդիմադիր քաղաքապետն ընտրություններում հաղթում է Էրդողանի թեկնածուին․ հարցում

Ընդդիմադիր Ժողովրդահանրապետական կուսակցությունից Ստամբուլի գործող քաղաքապետ Էքրեմ Իմամօղլուն գերազանցում է իշխող Արդարություն և զարգացում կուսակցության քաղաքապետի թեկնածուին՝ համաձայն վերջին հարցման արդյունքների։ Ստամբուլում գործող Spectrum House վերլուծական կենտրոնի կողմից անցկացված հարցման արդյունքներով՝ Իմամօղլուն հավաքել է ձայների 43,9 տոկոսը, իսկ ԱԶԿ-ի թեկնածու Մուրադ Քուրումը՝ 39 տոկոսը։

Թուրքիայում մարտի 31-ին կայանալիք տեղական ինքնակառավարման մարմինների ընտրություններին տասը օր է մնացել։

Հարցումն անցկացվել է մարտի 15-ից 20-ը Ստամբուլի 26 շրջաններում, որին մասնակցել է 2158 մարդ։

Ստամբուլի քաղաքապետի մյուս թեկնածուները՝ Մերալ Դանիշ Բեշթաշը և Մուրադ Չեփնին քրդամետ Ժողովուրդների հավասարություն և ժողովրդավարություն կուսակցությունից (DEM կուսակցություն) ստացել են ձայների 4,7 տոկոսը, ազգայնական İYİ (Լավ) կուսակցության թեկնածու Բուղրա Քավունջուն՝ 2,6 տոկոսը, «Նոր բարեկեցություն» կուսակցության (YRP) թեկնածու Մեհմեդ Ալթընյոզը՝ 3,7 տոկոսը, իսկ ծայրահեղ աջ «Հաղթանակ» կուսակցության թեկնածու Ազմի Քարամահմութօղլուն՝ 3,3 տոկոսը։

Մինչ DEM կուսակցության նախորդը՝ Ժողովուրդների դեմոկրատական կուսակցությունը (HDP), 2019 թվականի ընտրություններում պաշտպանում էր Իմամօղլուին և չէր առաջադրել իր թեկնածուին, DEM կուսակցությունը որոշել է  այս անգամ քաղաքապետի պաշտոնի համար մրցավազքի մեջ մտնել սեփական թեկնածուով՝ Ժողովրդահանրապետական կուսակցության հետ ունեցած անհամաձայնությունների պատճառով։

Քաղաքական դաշինքների փոփոխությունը կարող է ազդել Ստամբուլի ընտրությունների արդյունքի վրա, որտեղ Իմամօղլուն կարող է տուժել քուրդ ընտրողների աջակցության բացակայության պատճառով։

Իմամօղլուն, որը համարվում է նախագահ Էրդողանի ամենահզոր քաղաքական մրցակիցը, վերջ էր դրել Ստամբուլում ԱԶԿ-ի երկարատև կառավարմանը, երբ 2019 թվականին կրկնակի ընտրություններում հաղթել էր կուսակցության թեկնածուին:

Էմմա Չոբանյան