Քաղաքականություն
21.03.2024 | 22:37
Ադրբեջանի իշխանությունները շարունակում են հայկական Մեծամորի ատոմակայանի գործունեության դեմ արշավը՝ այս անգամ օգտագործելով Բրյուսելում մեկնարկած Միջուկային էներգիայի առաջին գագաթնաժողովը։
Մասնավորապես, ադրբեջանական մի շարք կազմակերպություններ նամակ են հղել գագաթնաժողովի համանախագահներին՝ Բելգիայի վարչապետ Ալեքսանդր դե Կրուային և ՄԱԳԱՏԷ-ի ղեկավար Ռաֆայել Գրոսսիին՝ կոչ անելով գագաթնաժողովի ղեկավարությանը ուշադրություն դարձնել, իբր, «վթարային վիճակում գտնվող Հայաստանում Մեծամորի ատոմակայանի կողմից բխող գլոբալ վտանգին»։
Նամակի հեղինակները կոչ են արել Հայաստանի կառավարության առջև բարձրացնել ԱԷԿ-ի գործունեությունն անհապաղ դադարեցնելու հարցը։
«Հայաստանի իշխանությունների անպատասխանատու պահվածքը Մեծամորի ատոմակայանի հարցում, համաշխարհային հանրությանը մոլորեցնող, սուտ խոստումները տարածաշրջանը մղում են դեպի Չեռնոբիլի և Ֆուկուսիմայի ատոմակայանների նման աղետի»,- ասված է նամակում։
Հավելենք, որ Մեծամորի ատոմակայանին, Ադրբեջանից զատ, որևէ վտանգ չի սպառնում։ Դեռևս 2020 թվականի հուլիսին տավուշյան մարտերի ժամանակ Ադրբեջանի ՊՆ խոսնակը սպառնացել էր, որ ժամանակակից հրթիռային համակարգերը, որոնք գտնվում են ադրբեջանական բանակի զինանոցում, կարող են մեծ ճշգրտությամբ հարվածել Մեծամորի ԱԷԿ-ին։
Ի դեպ, 2022 թվականի հոկտեմբերին էլ ՄԱԳԱՏԷ-ի ղեկավար Ռաֆայել Գրոսսին անձամբ էր այցելել Մեծամորի ատոմակայան ու բարձր գնահատել կայանի աշխատանքը։
«Հայաստանի տնտեսությունը հենված է Մեծամորի ատոմային էլեկտրակայանի վրա, և Ատոմային էներգիայի միջազգային գործակալությունը շարունակելու է իր աջակցությունն առաջարկել՝ օգնելու ատոմակայանին ցածր ածխածնային էներգիան մատակարարել ապահով և անվտանգ կերպով։ Ուրախ եմ տեսնել Մեծամորում արված անվտանգային բարեփոխումները, տպավորված եմ նվիրված անձնակազմի հանձնառությամբ»,- գրել էր Գրոսսին թվիթերյան իր էջում։
Էմմա Չոբանյան
