Չինական բանկերը սկսել են արգելափակել Ռուսաստանից յուանով վճարումները

Ռուսաստանի դեմ արևմտյան պատժամիջոցների խստացման ֆոնին չինական որոշ բանկեր դադարեցրել են Ռուսաստանից յուանով վճարումների ընդունումը։ Ֆինանսական հաստատությունների հաճախորդները սկսել են ստանալ համապատասխան ծանուցումներ, իսկ վճարումները հետ են վերադարձվում, հաղորդում է «Իզվեստիան»՝ վկայակոչելով բիզնես հատվածի և վճարային շուկայի իր աղբյուրներին:

Վերջին երկու ամսվա ընթացքում Ping An Bank-ը և Bank of Ningbo-ն, որոնք կապիտալիզացիայի առումով Չինաստանում զբաղեցնում են 13-րդ և 15-րդ հորիզոնականները, դադարեցրել են համապատասխան ծառայությունների մատուցումը, գրում է պարբերականը։

Բացի այդ, ևս վեց փոքր բանկեր հրաժարվում են ընդունել նման վճարումներ՝ China Guangfa Bank-ը, Kunshan Rural Commercial Bank-ը, Great Wall West China Bank-ը, Shenzhen Rural Commercial Bank-ը, Dongguan Rural Commercial Bank-ը և China Zheshang Bank-ը։

Պարբերականի զրուցակիցներից մեկը պարզաբանել է, որ հունվարի կեսերից ձեռնարկված նման միջոցառումների պատճառը չինացի բանկիրների մտավախություններն են ԱՄՆ-ի կողմից երկրորդական պատժամիջոցների ներդրման և այլ ճնշումների հետ կապված։

Փետրվարի սկզբին հայտնի դարձավ, որ չինական առանցքային Chouzhou Commercial Bank-ը դադարեցրել է ֆինանսական գործարքները Ռուսաստանի Դաշնության և Բելառուսի հետ։ Հաշվարկների դադարեցումը կախված չէ վճարային համակարգից, գրում է «Վեդոմոստին»՝ վկայակոչելով գործարար շրջանակների երեք աղբյուրների տվյալները։

Ցանկացած գործարք դադարեցվել է ոչ միայն SWIFT-ով, այլ նաև ռուսական SPFS-ով և չինական CIPS-ով։