Քաղաքականություն
14.03.2024 | 21:27
Ճապոնիայի հյուսիս-արևելքում 5,8 մագնիտուդով երկրաշարժ է գրանցվել: ՏԱՍՍ-ի փոխանցմամբ՝ երկրի ազգային օդերեւութաբանական վարչության տվյալներով՝ էպիկենտրոնը գտնվել է Ֆուկուսիմա պրեֆեկտուրայում։
Ստորգետնյա ցնցումներից առաջ աշխատել է արտակարգ ահազանգերի համակարգը. տեղի բնակիչների բջջային սարքերին մոտալուտ երկրաշարժի մասին նախազգուշացում է ստացվել: Տեկտոնական հարվածից հետո սեյսմոլոգները ցունամիի սպառնալիք են հայտարարել երկրի հյուսիսարևելյան ափի համար, սակայն մի քանի րոպե անց նախազգուշացումը հանվել է: Ստորգետնյա ցնցումները զգացվել են Ճապոնիայի հյուսիսարեւելյան և կենտրոնական հատվածի յոթ պրեֆեկտուրաներում, այդ թվում՝ Ֆուկուսիմա, Միյագի և Տոկիո պրեֆեկտուրաներում:
Տուժածների կամ ավերածությունների մասին տեղեկություններ չկան: «Ֆուկուսիմա-1» վթարային ԱԷԿ-ում արտակարգ իրավիճակի մասին տվյալներ ևս չեն ստացվել, կայանի շրջանում ռադիացիոն ֆոնի մակարդակի փոփոխություններ նույնպես չեն գրանցվել:
Երկրաշարժից հետո «Ֆուկուսիմա-1» վթարային ԱԷԿ-ի օպերատորը դադարեցրել է մաքրված ջրի արտանետումը կայանից։ Այս մասին հայտնում է Kyodo գործակալությունը։
