Քաղաքականություն
14.03.2024 | 11:33
Հունվարին Վրաստանի Հանրապետություն կատարած այցի ժամանակ վարչապետ Նիկոլ Փաշինյանը հայտարարել էր, որ պայմանավորվել են և հանձնարարել համապատասխան գերատեսչություններին գործնական քայլեր ձեռնարկել Հայաստանի և Վրաստանի միջպետական սահմանի սահմանազատման գործընթացն ավարտին հասցնելու ուղղությամբ:
Factor.am-ը գրավոր հարցում էր ուղարկել վարչապետի աշխատակազմ պարզելու՝ արդյո՞ք Փաշինյանի այս հանձնարարականի շրջանակներում որևէ քայլ կատարվո՞ւմ է, և ինչո՞ւ է որոշվել հենց այս փուլում պայմանավորվել և իրականցնել Վրաստանի հետ սահմազատում։
Վարչապետի աշխատակազմը հարցումը վերահասցեագրել էր Արտաքին գործերի նախարարությանը։
Արտաքին քաղաքական գերատեսչությունից մեր հարցին ի պատասխան հայտնել են, որ Հայաստանի և Վրաստանի միջև պետական սահմանի սահմանազատման գործընթացը մեկնարկել է 1995 թվականին, երբ Հայաստանի և Վրաստանի միջկառավարական պատվիրակությունները պայմանավորվածություն են ձեռք բերել ձևավորել պետական սահմանի սահմանազատման և սահմանագծման հարցերով հանձնաժողովներ։
ԱԳՆ-ի փոխանցմամբ՝ Հայաստանի և Վրաստանի բարձրաստիճան ներկայացուցիչների վերջին շփումների ընթացքում ձևավորված ընդհանուր ընկալումից զատ անհրաժեշտ է ակտիվացնել Հայաստանի և Վրաստանի միջև միջպետական սահմանի սահմանազատման և սահմանագծման աշխատանքները։
Հարցման մեջ նշվում է, որ այլ պայմանավորվածություններ ձեռք չեն բերվել։
«Վրացական կողմի հետ քննարկվում են համատեղ աշխատանքների վերսկսման ժամկետները և հանձնաժողովների աշխատանքների մասին տեղեկությունը կներկայացվի պատշաճ ժամկետում»,- պատասխանել են գերատեսչությունից՝ չհստակեցնելով որևէ ժամկետ։
Միաժամանակ հայտնել են, որ վարչապետի նախորդ տարվա որոշմամբ հաստատվել է Հայաստանի պետական սահմանի սահմանագծման և սահմանազատման հարցերով հանձնաժողովի նոր կազմը։ Թե ովքեր են Վրաստանի հետ սահմանազատման հարցերով հանձնաժողովի նոր կազմի անդամները՝ ԱԳՆ-ից այդպես էլ չեն մասնավորեցրել։
Հիշեցնենք՝ վարչապետ Նիկոլ Փաշինյանի՝ հարևան երկիր այցի շրջանակում նաև Հայաստանի և Վրաստանի միջև ռազմավարական գործընկերություն հաստատելու մասին համատեղ հռչակագիր էր ստորագրվել։
Պատկան կառույցներից հետաքրքրվել էինք, թե այս ռազմավարական հռչակագրով ի՞նչ պայմանավորվածություններ են ձեռք բերվել, այն գործնականում ի՞նչ է տալու մեր երկրին։ Այս հարցին ո՛չ վարչապետի աշխատակազմն է պատասխանել, ո՛չ էլ՝ ԱԳՆ-ն։
Մանյա Պողոսյան
