«Ելք» դաշինքն իրեն սպառել է. ամենայն հավանականությամբ ԱԺ ընտրություններին ևս ՔՊ-ն առանձին կմասնակցի. Ալեն Սիմոնյան․ ՏԵՍԱՆՅՈՒԹ

«Եթե Դաշնակցությունը գտնում է, որ Կառավարության գործունեությունը սխալ է, ապա ավելի ազնիվ կլինի լքել կառույցը»,- Factor.am-ի հետ զրույցում, պատասխանելով ՀՅԴ Բյուրոյի ներկայացուցիչ Հրանտ Մարգարյանի հայտարարությանը, նշեց ԱԺ «Ելք» խմբակցության պատգամավոր, ՔՊ վարչության անդամ Ալեն Սիմոնյանը:

Հիշեցնենք՝ երեկ Ազատություն ռ/կ-ի հետ զրույցում Հրանտ Մարգարյանն ասել էր, որ չեն բացառում Ռոբերտ Քոչարյանի հետ համագործակցությունը, եթե նա քաղաքականություն վերադառնալու հայտ ներկայացնի:

Իշխող ուժի ներկայացուցիչը, հակադարձելով Հրանտ Մարգարյանին, ասաց՝ եթե իրենք Քոչարյանի հետ համագործակցությունը չեն բացառում, ապա ինքն էլ չի բացառում, որ ՀՅԴ-ն իր այս գործելաոճով մյուս Ազգային ժողովում ներկայացված չլինի:

«Դաշնակցության նկատմամբ վերաբերմունքն առանց այդ էլ բացասական է, դա ցույց տվեցին Ազգային ժողովի վերջին ընտրությունները, երբ ՀՅԴ-ն շատ մեծ դժվարությամբ հատեց անցողիկ շեմը»,- ընդգծեց Սիմոնյանը՝ նկատելով, որ ժամանակին Ռոբերտ Քոչարյանն օգնել է, որ Հրանտ Մարգարյանը բանտից դուրս գալ, հիմա էլ Մարգարյանն իր անձնական պարտքն է վերադարձնում՝ օգտագործելով Դաշնակցության բրենդը:

«Քաղաքացիական պայմանագիր» կուսակցության անդամն անդրադարձավ նաև «Ելք» դաշինքի հետագա գործունեությանը՝ արձանագրելով, որ դաշինքն արդեն իրեն սպառել է:
««Ելք» դաշինքը մնաց հեղափոխությունից այն կողմ: ՔՊ-ն Երևանի ավագանու ընտրություններին կմասնակցի առանձին, ամենայն հավանականությամբ ԱԺ ընտրություններին ևս առանձին կմասնակցի»,- հայտնեց պատգամավորը:

Հարցազրույցն ամբողջությամբ՝ տեսանյութում:

Շողիկ Գալստյան