Քաղաքականություն
11.03.2024 | 22:12
Վրաստանն Ուկրաինայից պահանջում է արտահանձնել Միխեիլ Սաակաշվիլիի նախագահության ժամանակաշրջանի պաշտոնատար անձանց՝ «հարաբերությունները կարգավորելու համար»։ Այս մասին ասված է Վրաստանի կառավարության կայքում հրապարակված հայտարարության մեջ, փոխանցում է Korrespondent-ը:
«Առաջին հերթին, հարաբերությունների կարգավորման համար չափազանց կարևոր և անհրաժեշտ է, որ ուկրաինական իշխանությունները Վրաստանին արտահանձնեն հանցագործներին, որոնք այժմ բարձր պաշտոններ են զբաղեցնում երկրի վարչակազմում»,- ասվում է ուղերձում։
Թբիլիսիում պնդում են, որ Ուկրաինայի իշխանություններում բարձր պաշտոններ են զբաղեցնում մարդիկ, ովքեր Վրաստանում հետախուզման մեջ են կամ դատապարտված են տարբեր մեղադրանքներով։ Մասնավորապես, վրացական կողմն անհրաժեշտ է համարել իր դիրքորոշումը հայտնել ԵՄ-ում և Գերմանիայում Ուկրաինայի պաշտոնական պատվիրակության կազմում Զուրաբ Ադեիշվիլիին ընդգրկելուց հետո։
«Այս առումով հատկապես մտահոգիչ է այն փաստը, որ Զուրաբ Ադեիշվիլին զբաղեցնում է Ուկրաինայի գլխավոր դատախազի խորհրդականի պաշտոնը, իսկ Գեորգի Լորտկիպանիձեն՝ Ուկրաինայի հակահետախուզական ծառայության ղեկավարի տեղակալը»,- ասվում է հայտարարության մեջ։
Վրաստանի կառավարությունը հույս է հայտնել, որ Կիևը կվերանայի որոշումները, որոնք «խիստ հակասում են Վրաստանի և Ուկրաինայի, ինչպես նաև վրաց և ուկրաինացի ժողովուրդների բարեկամության ոգուն»։
«Վրաստանի կառավարությունը զարմացած է ուկրաինական իշխանությունների ընդունած որոշումներից, որոնք արհեստականորեն սեպ են խրում պատմականորեն բարեկամ երկու երկրների և ժողովուրդների միջև»,- ասվում է հայտարարության մեջ։
Հայտնի է, որ Զուրաբ Ադեիշվիլիին մի շարք մեղադրանքներ են առաջադրվել 2012 թվականին Վրաստանում տեղի ունեցած իշխանափոխությունից հետո, որոնք նա անվանում է քաղաքական հետապնդում։ Երեք դեպքերում նրան դատապարտել են 2-ից 5 տարվա ազատազրկման։ 2015 թվականին Ադեիշվիլին քաղաքական ապաստան է ստացել Ռումինիայում, իսկ 2021 թվականին հրաժարվել է Վրաստանի քաղաքացիությունից։ Վերջին տարիներին նա աշխատում էր Ուկրաինայում։
Վրաստանի իշխանությունները բազմիցս փորձել են Ադեիշվիլիի նկատմամբ միջազգային հետախուզում հայտարարել:
Գեորգի Լորտկիպանիձեն մեղադրվում է Միխեիլ Սաակաշվիլիի կողմից պետական սահմանի ենթադրյալ ապօրինի հատմանը մասնակցության մեջ։ Վրաստանի դատախազությունը պնդում է, որ հենց Լորտկիպանիձեն է մշակել նախկին նախագահի՝ հայրենիք վերադառնալու ծրագիրն ու երթուղին։
Ուկրաինայի և Վրաստանի հարաբերությունները բարդ շրջան են ապրում։ Թբիլիսին հրաժարվել է պատժամիջոցներ կիրառել Ռուսաստանի դեմ, ինչպես նաև արգելել է իր քաղաքացիներին միանալ Ուկրաինայի զինված ուժերին։
