Քաղաքականություն
11.03.2024 | 22:44
Մինչև այս ամառ 12 ուկրաինացի օդաչուներ, որոնք 10 ամիս ուսուցում են անցել Դանիայում, Մեծ Բրիտանիայում և ԱՄՆ-ում, պատրաստ կլինեն թռչել F-16 կործանիչներով։ Սակայն մինչ օդաչուների վերադարձը Ուկրաինա, եվրոպացի դաշնակիցների կողմից խոստացված մոտ 45 կործանիչներից միայն վեցը կմատակարարվի, գրում է The New York Times-ը։
Ըստ պարբերականի՝ զգալի անորոշություն է մնում այն հարցում, թե երբ և քանի ինքնաթիռ կհանձնեն առանձին եվրոպական երկրներ, որքան արագ կարող են ուսուցանվել օդաչուները և որտեղից Ուկրաինան բավականաչափ անձնակազմ կստանա այդ կործանիչները պատշաճ կերպով պահպանելու համար (յուրաքանչյուր ինքնաթիռ կարիք ունի 8-ից մինչև 14 հոգանոց անձնակազմի)։
Նորմալ չափանիշների հաշվի առնելով ուկրաինացի օդաչուների վերապատրաստումն արևմտյան ժամանակակից ինքնաթիռների վրա տեղի է ունենում գրեթե կայծակնային արագությամբ, քանի որ այն տևում է ոչ թե տարիներ, այլ ամիսներ: Այնուամենայնիվ, այն դեռ ավելի երկար է տևում, քան ակնկալում էին Ուկրաինան և նրա դաշնակիցները, քանի որ ուկրաինացի օդաչուները պետք է սերտեն անգլերեն և պիլոտաժի արևմտյան տեխնիկան՝ F-16-ներն արդյունավետ գործարկելու համար:
Դանիան, Նիդերլանդները, Նորվեգիան և Բելգիան խոստացել են մոտ 45 կործանիչներ ուղարկել Ուկրաինա, ինչը բավարար է երեք փոքր էսկադրիլիաների համար: Դանիան խոստացել է ուղարկել առաջին վեց F-16 ինքնաթիռները մինչև գարնան վերջ, ևս 13-ը կհասնեն մինչև տարեվերջ և 2025 թվականին։
Մյուս երկրները դեռևս չեն կողմնորոշվել առաքման ժամկետների հարցում:
