Փաշինյանի օրակարգում ռուս սահմանապահներին Զվարթնոցից հեռացնելու հարցն է. ինչ զարգացումներ են սպասվում. ՏԵՍԱՆՅՈՒԹ

Նիկոլ Փաշինյանին ու թիմակիցներին անհանգստացնում է «Զվարթնոց» օդանավակայանում ռուս սահմանապահների ներկայությունը։ Factor TV-ի հարցին ի պատասխան՝ այսօր հայտարարեց իշխող ՔՊ խմբակցության քարտուղար Արթուր Հովհաննիսյանը։

Իշխանական պատգամավորը հրաժարվեց քննարկումներից մանրամասներ հաղորդել։ Միայն ակնարկեց, որ դրանք ռուս սահմանապահներին «Զվարթնոց» օդանավակայանից հեռացնելու վերաբերյալ են։

Հայաստանում ռուս սահմանապահների ներկայությունն ամրագրվել է 1992 թվականի սեպտեմբերի 30-ին ստորագրված «ՀՀ և ՌԴ միջև Հայաստանի Հանրապետության տարածքում գտնվող ՌԴ սահմանապահ զորքերի կարգավիճակի և նրանց կենսագործունեության մասին» պայմանագրով: Factor TV-ն ուսումնասիրել է երկկողմ պայմանագիրը, որտեղ միայն նշված է հայ-թուրքական և հայ-իրական սահմաններին ծառայություն իրականացնելու մասին, որևէ հիշատակում չկա «Զվարթնոց» օդանավակայանի վերաբերյալ։

Այս առնչությամբ 2018 թվականին ԱԱԾ-ից «Հետք»-ին հայտնել էին, որ պայմանագիրը ստորագրելու պահին՝ 1992-ի սեպտեմբերին, ռուս սահմանապահներն արդեն իսկ տեղաբաշխված են եղել «Զվարթնոց» օդանավակայանում, իսկ միջպետական պայմանագրի 4-րդ հոդվածում նշվում է, որ ՀՀ տարածքում գտնվող ՌԴ սահմանապահ զորքերի կազմակերպական-հաստիքային կառուցվածքը պայմանագրի ստորագրման պահին, նրանց տեղաբաշխման վայրերը պահպանվում են մինչև ՀՀ և ՌԴ միջև հատուկ համաձայնագրերի կնքումը։

ԱԺ պետաիրավական հարցերի հանձնաժողովի նախագահ, իշխանական Վլադիմիր Վարդանյանը, սակայն, այսօր Factor TV-ի հարցին ի պատասխան՝ հայտնեց, որ սահմանապահների տեղակայման համար լրացուցիչ իրավական հիմքեր չեն ստեղծվել։

«Պատիվ ունեմ» խմբակցության քարտուղար Հայկ Մամիջանյանին չի անհանգստացնում, որ ռուս սահմանապահները «Զվարթնոց»-ում են, նա մտահոգիչ է համարում ադրբեջանցիների ներկայությունը ՀՀ սուվերեն տարածքներում։ Այդուհանդերձ, ընդդիմադիր պատգամավորն ասում է՝ գիտի, թե ռուսներն ինչ հիմքով են օդանավակայանում։

Ընդդիմադիր «Հայաստան» խմբակցության ղեկավար Սեյրան Օհանյանն էլ վտանգավոր է համարում ՀՀ-ից ՌԴ սահմանապահների հեռացումը։

Հիշեցնենք՝ 2022 թվականին, երբ ադրբեջանական կողմը հարձակվել էր ՀՀ ինքնիշխան տարածքների վրա, զուգահեռ ռուս սահմանապահները լքում էին Սյունիքի մարզի իրենց ծառայության կետերը։

Ռուս սահմանապահները ՀՀ-ում են 32 տարի, որից վեց տարին ՀՀ-ում պաշտոնավարում է Նիկոլ Փաշինյանը։ Factor TV-ն այսօր իշխանական պատգամավորներից հետաքրքրվեց՝ ինչո՞ւ վեց տարի անց միայն գլխի ընկան, որ ռուս սահմանապահների ներկայությունն անհանգստացնող է։

Նիկոլ Փաշինյանի թիմակիցը չի պարզաբանում՝ ռուսական կողմի հետ այս հարցով քննարկումներ եղե՞լ են, թե՝ ոչ։ Այսօր փորձեցինք մեկնաբանություն ստանալ նաև ՀՀ-ում ՌԴ դեսպանատնից։ Դիվանագիտական ներկայացուցչության խոսնակը նախ նշեց, որ պետք է համաձայնեցնի մեկնաբանություն տալու հարցը, այնուհետև չպատասխանեց հեռախոսազանգերի։

Մանրամասները՝ տեսանյութում։

Նարեկ Կիրակոսյան