Քաղաքականություն
29.02.2024 | 20:16
Ամերիկյան Veeam Software և Object First ընկերությունների հիմնադիրներ Անդրեյ Բարոնովը և Ռատմիր Տիմաշևը հրաժարվել են Ռուսաստանի քաղաքացիությունից։ Այս մասին հայտնել է Forbes-ը։
Երկու ձեռնարկատերերն էլ երկար ժամանակ ապրում են արտասահմանում. Բարոնովը՝ Շվեյցարիայում, Տիմաշևը՝ ԱՄՆ-ում։ Ռուսական անձնագրից հրաժարվելուց հետո նրանք պահպանել են Կիպրոսի քաղաքացիությունը։
2017-2021 թվականներին Բարոնովը և Տիմաշևը ներառվել են Forbes-ի վարկածով Ռուսաստանի 200 ամենահարուստ գործարարների վարկանիշում։
2020 թվականին ամսագիրը Բարոնովի կարողությունը գնահատել է 770 միլիոն դոլար, Ռատմիր Տիմաշևինը՝ 680 միլիոն դոլար։ Նրանց հարստության հիմքը Veeam Software-ի ամերիկյան Insight Partners վենչուրային հիմնադրամին վաճառքից ստացված եկամուտն է հինգ միլիարդ դոլարի չափով։
Անդրեյ Բարոնովը հայտնել է Ռուսաստանի քաղաքացիությունից հրաժարվելու փաստաթղթերի ներկայացման մասին դեռ 2023 թվականին LinkedIn սոցիալական ցանցի իր հաշվում։ Գրառման մեջ նա քննադատել է ռուսական զորքերի մուտքն Ուկրաինա և ասել, որ միլիոնավոր դոլարներ է նվիրաբերել հեղինակավոր մարդասիրական կազմակերպություններին, որոնք օգնել են «Ուկրաինայի տարածքում տեղահանված ուկրաինացիներին»։
Forbes-ը նշում է, որ գործարարները քաղաքացիությունից հրաժարվելու ընթացակարգն անցել են Կիպրոսում ՌԴ դեսպանատանը։ Բարոնովը և Տիմաշևը դարձել են ութերորդ և իններորդ ձեռներեցները Forbes-ի ցուցակի նախկին և ներկա անդամների շարքում, ովքեր ուկրաինական պատերազմի սկսվելուց հետո հրաժարվել են Ռուսաստանի քաղաքացիությունից։
