Պենտագոնը կարող է Ուկրաինայի համար գումար վերցնել իր պահուստներից

Պենտագոնը դիտարկում է Ուկրաինային իր պահուստներից ռազմական օգնություն տրամադրելու հնարավորությունը, որի ընդհանուր գումարը կազմում է շուրջ 4 մլրդ եվրո։ Նախկինում գերատեսչությունը նախատեսում էր այդ պահուստները ծախսել միայն այն դեպքում, եթե դրանք փոխհատուցվեն Կոնգրեսի կողմից ընդունված ֆինանսավորման փաթեթով: Այս մասին հայտնել է CNN-ը՝ հղում անելով Պենտագոնի մի քանի պաշտոնյաների։

Քանի որ Ուկրաինայի ֆինանսավորման մասին օրինագիծը մնացել է Կոնգրեսում, գերատեսչությունը սկսել է քննարկել օգնություն ուղարկելու հարցը՝ նույնիսկ առանց միջոցների փոխհատուցման երաշխիքների։

CNN-ի զրուցակիցները նշել են, որ այս հնարավորության իրագործման և օժանդակության տրամադրման մի շարք այլ ծրագրերի մասին խոսակցությունները գնալով ավելի արդիական են դարձել վերջին շաբաթների ընթացքում, քանի որ մի կողմից Կոնգրեսում մնացել է Ուկրաինայի ֆինանսավորման մասին օրինագիծը, մյուս կողմից՝ ուկրաինական զորքերի վիճակը գնալով բարդանում է։

Պենտագոնի պաշտոնյաներից մեկը CNN-ին ասել է, որ օգնության նոր փաթեթը, եթե հաստատվի, կներառի «կարևոր ռազմամթերք»: Նրա խոսքով՝ գերատեսչությունում խոսվում է նաև այն մասին, թե ինչպես և որտեղ պետք է ռազմական օգնություն տրամադրել, որպեսզի այն հնարավորինս արագ ուղարկվի Ուկրաինա։

ԱՄՆ Կոնգրեսը 2023 թվականի հոկտեմբերից քննարկում է Ուկրաինային ֆինանսական օգնություն տրամադրելու օրինագիծը։ Փետրվարի կեսերին Սենատը հավանություն է տվել Ուկրաինային, Իսրայելին և Թայվանին ավելի քան 95 միլիարդ դոլար օգնություն հատկացնելու նախաձեռնությանը։

Այժմ փաստաթուղթը պետք է հաստատվի Ներկայացուցիչների պալատի կողմից, սակայն դրա խոսնակ Մայք Ջոնսոնն ասել է, որ, ամենայն հավանականությամբ, այն կմերժվի։ Պատճառն այն է, որ փաստաթղթի ներկայիս տարբերակը չի ներառում ԱՄՆ հարավային սահմանին սահմանային հսկողության խստացման ծախսերը, ինչի մասին պնդում է ստորին պալատում գերիշխող Հանրապետական կուսակցությունը։