Ալիևը նեղսրտել է, որ գերմանական մամուլում Ադրբեջանը բնութագրվում է որպես բռնապետություն

Ադրբեջանի  նախագահ Իլհամ Ալիևը նախօրեին Գերմանիայի տնտեսության արևելյան կոմիտեի նախագահ Մայքլ Հարմսի գլխավորած պատվիրակությանը ընդունելիս բողոքել է՝ ասելով, որ գերմանական մամուլում իր երկիրը ներկայացվում է որպես բռնապետություն։

Մասնավորապես, Ալիևը «ցավով նշել է, որ գերմանական մամուլն Ադրբեջանը ներկայացնում է որպես բռնապետ ​​երկիր, որտեղ չեն ապահովվում ազատությունները, մարդկանց ձերբակալում են իրենց կարծիքի համար, և որտեղ տիրում է բռնապետություն»։

«Դա բացարձակ սուտ է, և ես ցավում եմ այդ կապակցությամբ»,- ասել է Ալիևը՝ նշելով, որ այդ հրապարակումների հեղինակները, իբր, «իրենք էլ դա լավ գիտեն»։

Ալիևն ասել է, թե Ադրբեջանի մասին, իբր, միտումնավոր շատ բացասական տպավորություն է ստեղծվում։

Նշենք, որ ԵԽԽՎ-ում հունվարի 24-ին Ադրբեջանի լիազորությունները մեկ տարով դադարեցնելու որոշման ընդունումից հետո Բաքուն քարոզչական արշավ է սկսել գերմանացի պատգամավոր Ֆրանկ Շվաբեի դեմ, որը բանաձևի ակտիվ աջակիցներից է։

Բացի այդ, գերմանական մամուլում ակտիվորեն քննարկվում են կոռուպցիոն մեղադրանքները, որոնք Մյունխենի դատախազությունը ներկայացրել է Քրիստոնեա-դեմոկրատական միության երկու նախկին պատգամավորների՝ Ադրբեջանից ենթադրյալ կաշառք ստանալու համար՝ Եվրոպայի խորհրդում Բաքվի օգտին քվեարկելու դիմաց։ Եվրոպայի խորհրդի Խորհրդարանական վեհաժողովի նախկին անդամներ Աքսել Ֆիշերը և Էդուարդ Լինթները ներգրավված են եղել «Ադրբեջանական լվացքատուն» անվանումը ստացած ու ԵՄ-ում լայնորեն գործող փողերի լվացման և լոբբինգի սխեմայում։

Պաշտոնական Բաքվին, ըստ երևույթին, բարկացրել է նաև Գերմանիայում նկարահանված «Am Abgrund» գեղարվեստական  ֆիլմը, որը բացահայտում է իրավիճակն Ադրբեջանի ներսում և դրա կոռուպցիոն գործարքները եվրոպական երկրներում, այդ թվում՝ ԵԽԽՎ-ում։

Ֆիլմը նկարահանել է գերմանական ARD հեռուստաընկերությունը՝ հիմնված տարբեր հետաքննությունների վրա այն մասին, թե ինչպես է Ադրբեջանի կառավարությունը կաշառել եվրոպական քաղաքական գործիչներին, այդ թվում՝ գերմանացի։ Ֆիլմի ռեժիսորը հետաքննող լրագրող Դանիել Հարիշն է, պրեմիերան կայացել է փետրվարի 20-ին Բունդեսթագում հատուկ կազմակերպված միջոցառման ժամանակ, իսկ հեռուստաընկերությունն այն ցուցադրելու է մարտի 7-ին։

Էմմա Չոբանյան