03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
Չինաստանի ներկայացուցիչը միջնորդական ջանքերի շրջանակում մարտին կայցելի ՌԴ, Ուկրաինա ու ԵՄ
Քաղաքականություն
28.02.2024 | 18:34
Չինաստանի ԱԳՆ-ն հայտարարել է, որ մարտին երկրի կառավարության Եվրասիական հարցերով հատուկ ներկայացուցիչ Լի Հուեյը կայցելի Ռուսաստան, Ուկրաինա ու Եվրամիության երկրներ, գրում է BBC-ի ռուսական ծառայությունը։
Երկրի ԱԳՆ պաշտոնական ներկայացուցչի խոսքով՝ այցը, որը կսկսվի մարտի 2-ին, տեղի կունենա «ուկրաինական ճգնաժամի քաղաքական լուծմանը նպաստող մաքոքային դիվանագիտության երկրորդ փուլի» շրջանակում։
Չին պաշտոնյան այցելելու է նաև Ֆրանսիա, Գերմանիա և Լեհաստան։
Անցյալ տարի Լի Հուեյն արդեն եղել է այդ տարածաշրջանում և բանակցություններ է վարել Մոսկվայում, Կիևում, եվրոպական այլ մայրաքաղաքներում, հիշեցնում է AFP-ն։ Ըստ լրատվամիջոցի՝ Չինաստանը պնդում է, որ չեզոք է Ռուսաստանի և Ուկրաինայի միջև պատերազմում, սակայն բազմիցս քննադատության է ենթարկվել ռուսական ներխուժումը հստակորեն դատապարտելուց հրաժարվելու համար։
Չինաստանը նաև չի միացել ՌԴ-ի դեմ Արևմուտքի պատժամիջոցներին ու ավելացրել է Ռուսաստանի հետ առևտրի ծավալները, այդ թվում՝ օգնելով պահպանել ռազմական արդյունաբերությունը։
Անցյալ տարի Չինաստանը հրապարակել էր մի փաստաթուղթ, որն անվանել էր հիմք հակամարտության քաղաքական լուծման համար, սակայն Ուկրաինան և արևմտյան երկրները հայտարարել էին, որ այն չի պարունակում խաղաղության տանող իրատեսական առաջարկներ։
