Աշոտ Փաշինյանի և Լևոն Քոչարյանի գործով մեղադրողը նույն անձն է. դատարանը մերժեց նրան վարույթից հեռացնելու միջնորդությունը

Երևանի քրեական դատարանում, նախագահությամբ դատավոր Կարեն Ֆարխոյանի, այսօր սկսվեց Հայաստանի երկրորդ նախագահ Ռոբերտ Քոչարյանի որդու՝ Ազգային ժողովի «Հայաստան» խմբակցության պատգամավոր Լևոն Քոչարյանի գործով նախնական դատալսումները:

Մեղադրյալների ինքնությունները ճշտելիս Լևոն Քոչարյանը նշեց, որ նախկինում դատված չի եղել, քրեական վարույթի շրջանակներում ձերբակալվել, ապա կալանավորվել է, կալանքի ժամկետը երկարացվել է, այնուհետև ազատ է արձակվել պատգամավոր դառնալուց հետո` ՍԴ որոշման ուժով:

«Ապա ափալ-թափալ կանչել են Քննչական կոմիտե` խափանման միջոց կիրառելու համար»,- ասաց Լևոն Քոչարյանը:

Գործով մյուս մեղադրյալ Սերգեյ Ասատուրովը գործով արգելանքի տակ չի գտնվել, դատարանին հայտնեց, որ միայն նախաքննության ավարտին իրեն կանչել են, մեղադրանք ներկայացրել ու խափանման միջոց ընտրել բացակայելու արգելքը:

Դատավարության մասնակիցները դատավոր Կարեն Ֆարխոյանին ինքնաբացարկի միջնորդություն չներկայացրին, Քոչարյանի պաշտպաններից Արամ Վարդևանյանը նախքան ինքնաբացարկի հարցին անդրադառնալը դատավորից ճշտեց` գործը նրան էլեկտրոնային եղանակո՞վ, թե՞ ձեռքով, այսինքն` դատարանի նախագահի կողմից է մակագրվել, ինչին ի պատասխան Կարեն Ֆարխոյանն ասաց, որ գործը էլեկտրոնային եղանակով է մակագրվել իրեն: Արամ Վարդևանյանը հայտնեց, որ այս պահին ինքնաբացարկի միջնորդություն չունի` միաժամանակ հիշելով նախաքննության ընթացքում Լևոն Քոչարյանի կալանքի միջնորդության քննությունը և հիշեցնելով, որ Լևոն Քոչարյանին կալանավորած դատավոր Մասիս Մելքոնյանը եղել է Լևոն Քոչարյանի հակառակ բևեռում գտնվող քաղաքական ուժի ցուցակով պատգամավորի թեկնածու և Լևոն Քոչարյանի հոր` Ռոբերտ Քոչարյանի վերաբերյալ քաղաքական հայտարարություններ է արել:

«Դատավոր Կարեն Ֆարխոյանը, ամեն դեպքում, ի տարբերություն Մասիս Մելքոնյանի, պատգամավորի թեկնածու չի եղել»,- ասաց Արամ Վարդևանյանը` ըստ էության ցանկանալով շեշտադրել, որ Լևոն Քոչարյանին նախաքննության ընթացքում կալանավորած դատավոր Մասիս Մելքոնյանի դեպքում ակնհայտ ինքնաբացարկի հիմքեր են եղել, սակայն վերջինն ինքնաբացարկ չի հայտնել և կալանավորել է նրան:

Դատարանն անցավ հաջորդ փուլին` դատավարության մասնակիցներին վարույթից հեռացնելու հարցի քննարկմանը:

Քոչարյանի պաշտպաններից Ալեքսանդր Կոչուբաևը հայտնեց, որ այս հարցին անդրադառնալուց առաջ հարց ունի մեղադրող Արթուր Դանիելյանին, և հարցրեց` մեղադրողն ինչ հարաբերություններ ունի Նիկոլ Փաշինյանի ընտանիքի հետ:

Արթուր Դանիելյանն ասաց, որ քրեական դատավարության օրենսգիրքը չի նախատեսում հարց ու պատասխանի ընթացակարգ և որ չի պատասխանելու հարցերին:

«Այս պատասխանն իմ մոտ էլ ավելի մեծացրեց համոզմունքը, որ ինքնաբացարկի միջնորդությունը պետք է ներկայացնել»,- ասաց Ալեքսանդր Կոչուբաևը:

Վերջինս մամուլի հրապարակումներից մեկը ցուցադրելով` ասաց որ դրանում նշվում է, որ մեղադրանքը պաշտպանող դատախազը և Աշոտ Փաշինյանը մտերմիկ զրուցում են և որպես հավաստիացում ներկայացվեցին կադրեր Աշոտ Փաշինյանի գործով դատական նիստին Փաշինյանի և մեղադրող Արթուր Դանիելյանի զրույցից:

Ապա Կոչուբաևը հարց բարձրացրեց, թե ինչպե՞ս ստացվեց, որ և՛ Աշոտ Փաշինյանի, և՛ Լևոն Քոչարյանի գործով մեղադրող ընտրվեց նույն անձը` Արթուր Դանիելյանը:

Պաշտպան Արամ Վարդևանյանը մեղադրողին վարույթից հեռացնելու միջնորդության վերաբերյալ դիրքորոշում հայտնելիս կրկին հիշեց Լևոն Քոչարյանի կալանքի նիստերը և նշեց, որ նրա կալանքի ժամկետը երկարացվելու նիստին մեղադրող Արթուր Դանիելյանն այն ժամանակ որպես հսկող դատախազ մասնակցում էր և փորձում համոզել, որ եթե Լևոն Քոչարյանը չլինի կալանավորված, գործը դատարան չի հասնի, այսինքն` նա ազատության մեջ գտնվելով` կազդի գործով վկաների վրա: Սա այն դեպքում, երբ գործով վկաները ոստիկաններ էին:

«Իմանալով որ Վերաքննիչ դատարանի դատավոր Մհեր Արղամանյանը պիտի այդ նույն օրը Քոչարյանին առաջին անգամ կալանավորելու որոշման դեմ բողոքի գործով որոշումը` հրապարակի, դատախազը դիրքորոշում հայտնեց, որ նույնիսկ այդ որոշյանը չի կարելի սպասել»,- ասաց Արամ Վարդևանյանը` ընդգծելով, որ այս գործով վկաներից մեկը բարձրաստիճան ոստիկան Հայկազ Ջոմարդյանն է:

«Այսինքն` Լևոնը գնալու էր Հայկազ Ջոմարդյանին խոչընդոտե՞ր»,- ասաց Արամ Վարդևանյանը: Ի վերջո, ըստ Արամ Վարդևանյանի, մեղադրող Արթուր Դանիելյանը ստացել է իր համար ցանկալի դատական ակտը, այն է` Լևոն Քոչարյանի կալանքը, սակայն դրանից հետո ակտիվ քննչական գործողություններ չեն կատարվել այնքան ժամանակ, մինչև Քոչարյանն ազատ է արձակվել:

«Լևոն Քոչարյանը նոյեմբորի 6-ին դուրս է գալիս, հետո ինտենսիվ գործողություններ են կատարում»,- դիտարկեց Արամ Վարդևանյանը:

Ըստ պաշտպանի՝ Լևոն Քոչարյանին կալանավորելու միջնորդություններում որպես կալանքի հիմք չի նշվել, որ առկա է փախուստի ռիսկ, բայց երբ ազատ արձակվելուց հետո նրա նկատմամբ խափանման միջոց է ընտրվել բացակայելու արգելքը, քննիչը որպես հիմք նշել է նաև փախուստի ռիսկը, սակայն դատախազը, որը նախկինում փախուստի ռիսկ չէր տեսնում, չի վերացրել քննիչի այս որոշումը:

Լևոն Քոչարյանը մեղադրողին վարույթից հեռացնելու միջնորդության վերաբերյալ դիրքորոշում հայտնելիս հակիրճ խոսեց` նշելով, որ բոլորին հասկանալի է, թե ինչ է կատարվում:

Մեղադրյակ Ասատուրովը նշեց որ դեպքի վերաբերյալ առկա է տեսագրություն:

«Եթե փաստացի չկա արարքը, որը նկարագրված է, ո՞նց կարող են մարդուն մեղադրել»,- հարց բարձրացրեց նա:

«Ես Արցախը հանձնվելուց մեկ օր շուտ իմ խաղաղ անհնազանդությունն եմ հայտնել: Ես հպարտ եմ, որ այս գործի շրջանակներում հայտնվել եմ մեղադրյալի աթոռին: Միանում եմ բացարկին»,- ասաց Ասատուրովը:

Մեղադրող Արթուր Դանիելյանը, անդրադառնալով Աշոտ Փաշինյանի և իր զրույցի հանգամանքին` հարցրեց` «Ո՞նց եք գնահատում մտերմիկ զրույցը», ապա պնդեց, որ առկա չի եղել մտերմիկ զրույց, Աշոտ Փաշինյանը տուժող է եղել այն գործով, որի դատական նիստերի ընթացքում տեսանկարահանվել է նրանց զրույցը և հիշեցրեց, որ այդ գործով Աշոտ Փաշինյանը տուժող էր, այսինքն` դատախազի հետ մեղադրանքի կողմում գտնվող անձ: Անդրադառնալով Լևոն Քոչարյանի կալանքի գործին իր մասնակցության հարցին` նշեց, որ Քրեական դատավարության օրենսգիրքը իրավունք է վերապահվում կալանքի միջնորդության քննությանը մասնակցել, հետևաբար՝ դա ինքնաբացարկի հիմք չէ իրեն:

«Ես դա չէի ասում»,- տեղից ասաց Արամ Վարդևանյանը: Նիստին ներկա տուժող ոստիկան Հրաչիկ Խաչատրյանը նշեց, որ ինքը ոչ մեկին չի ծեծել:

Դատարանը մերժեց մեղադրող Արթուր Դանիելյանին վարույթից հեռացնելու միջնորդությունը։

Արաքս Մամուլյան