Լոնդոնի քաղաքապետն առաջարկել է բռնագրավել ռուս օլիգարխների անշարժ գույքը

Լոնդոնի քաղաքապետ Սադիկ Խանն առաջարկել է բռնագրավել ռուս օլիգարխներին և կոռումպացված պաշտոնյաներին պատկանող անշարժ գույքը, վաճառել և կառուցել տներ աղքատների, այդ թվում՝ ուկրաինացի փախստականների համար։ Այս մասին հայտնում է LBC ռադիոկայանը։

Խմբագիրները մեջբերում են նամակը, որն ուղարկվել է Խանի կողմից Մեծ Բրիտանիայի բնակարանների նախարար Մայքլ Գովին։ Խանը նշում է, որ 2022 թվականին Լոնդոնում կոռուպցիայի մեջ ներգրավված ռուսների անշարժ գույքի արժեքը Transparency International միջազգային ոչ կառավարական կազմակերպության կողմից գնահատվել է 1,1 միլիարդ ֆունտ (1,4 միլիարդ դոլար): Այս գումարով հնարավոր կլինի ավելի քան չորս հազար տուն կառուցել ցածր եկամուտ ունեցող մարդկանց համար, հաշվարկել է Լոնդոնի քաղաքապետարանը։

«Նախարարները պետք է շտապ քայլեր ձեռնարկեն Պուտինի գործընկերների կողմից գնված գույքը բռնագրավելու համար, որպեսզի մենք կարողանանք ստացված եկամուտն օգտագործել ի շահ կարիքավորների»,- ասվում է Խանի հայտարարության մեջ:

Նամակն ուղարկվել է Ուկրաինա ռուսական ներխուժման տարելիցի հաջորդ օրը։ Ռուսական որոշ ակտիվներ պահվում են Նյու Յորքի Դաշնային պահուստային բանկում։

Կառուցված տների մի մասում, ըստ Խանի, կարող էին բնակվել ուկրաինացի փախստականները։ Նա նաև կոչ է արել վերսկսել ուկրաինացի փախստականների ընտանիքների համար կառավարության աջակցության ծրագիրը, որը փակվել էր փետրվարին, որպեսզի նրանք օրինական կերպով կարողանան տեղափոխվել իրենց հարազատների մոտ՝ աշխատելու և սովորելու իրավունքով։