14.11.2024 | 21:13
Կտրականապես մերժում ենք անհիմն տեսակետները․ Նիդերլանդների ԱԳՆ-ն արձագանքել է Ալիևի մեղադրանքներին
4000 հուշարձան`տոտալ ոչնչացման վտանգի տակ. Ադրբեջանը սրբում է հայկական հետքը. ՏԵՍԱՆՅՈՒԹ
Քաղաքականություն
26.02.2024 | 18:32
4 հազարից ավելի հայկական պատմամշակութային հուշարձան Արցախում գտնվում է տոտալ ոչնչացման վտանգի ներքո։ Դրանց թվում են եկեղեցիներ, խաչքարեր, դամբարանադաշտեր, պատմական գերեզմանոցներ, կամուրջներ։ Մշակութային ժառանգության փորձագետ Արմինե Տիգրանյանը, որն, ի դեպ, օրեր առաջ ելույթ ունեցավ Բրյուսելում՝ Եվրոպական խորհրդարանում, Արցախին նվիրված համաժողովում, ահազանգում է, որ Ադրբեջանն ուղղակի սրբում է հայկական հետքը։ «Հատկապես ծանր է պատմական, միջնադարյան հուշարձանների վիճակը, վերջերս Շուշիում ոչնչացվեցին 5-17-րդ դարերի հուշարձաններ, պատմական գերեզմանոցների տապանաքարեր: Ադրբեջանը ոչնչացնում է ամբողջական գերեզմանոցներ ու թաղամասեր»,-ասում է նա:
Factor TV-ն հավաքագրել է Ադրբեջանի կողմից Արցախում պատմամշակութային հուշարձանների ոչնչացման կամ վնասման ամենաթարմ դեպքերը։
Այսպիսով՝ բոլորովին վերջերս ադրբեջանական մշակութային վանդալիզմի հերթական զոհ դարձան Քարվաճառի շրջանի Ծար գյուղի Սուրբ Սարգիս և Սուրբ Գրիգոր եկեղեցիները։ Եկեղեցու տարածքում սկսվել են շինարարական աշխատանքներ․ հանվել են Սուրբ Սարգիս եկեղեցու խաչը, արձանագիր քարերից մեկը, եկեղեցու տարածքից բացակայում են նաև խաչքարերի բեկորները:
Այս տարվա փետրվարի սկզբին ոչնչացվել է Աշոտ Ղուլյանի՝ Բեկորի հուշաքարը։ Ադրբեջանը ոչնչացրել է նաև Ստեփանակերտի Վերին զբոսայգում ստեփանակերտցիների մանկության խորհրդանիշը հանդիսացող Արծվի հուշարձանը։
Իսկ ի՞նչ քայլեր է ձեռնարկում հայկական կողմը՝ վանդալիզմի նմանօրինակ դեպքերը կանխելու և միջազգային հանրությանը տեղի ունեցածի մասին իրազեկելու ուղղությամբ։ «Դեռևս 2020-ի դեկտեմբերից տարբեր դիմումներ, նամակներ, ցանկեր են ուղարկվել համապատասխան կառույցներ, հանդիպումներ են եղել ՅՈՒՆԵՍԿՕ-ի և այլ կառույցների ներկայացուցիչների հետ, բայց նրանց կողմից որևէ քայլ չի ձեռնարկվել»,-շեշտում է Արցախի մշակույթի, երիտասարդության հարցերի և զբոսաշրջության նախկին նախարար Լեռնիկ Հովհաննիսյանը: Մշակութային ժառանգության փորձագետները վստահ են՝ հարկավոր է ակտիվացնել հայկական կողմի հայցադիմումները Հաագայի դատարանում, առավել ակտիվ աշխատանքներ տանել ՅՈՒՆԵՍԿՕ-ի հետ, որպեսզի վերջինիս այցը տարածաշրջան Ադրբեջանի կողմից որևէ կերպ չխոչընդոտվի։
Մանրամասները`տեսանյութում:
Աննա Բաբաջանյան
