17.03.2026 | 23:25
ԻՀՊԿ-ն հաստատել է «Բասիջ» ուժերի հրամանատար Ղոլամռեզա Սուլեյմանիի մահը
Ուկրաինան ավելի քան 160 երկրների կհրավիրի «խաղաղության գագաթնաժողովին»
Քաղաքականություն
26.02.2024 | 15:29
Ավելի քան 160 երկրների ներկայացուցիչներ կհրավիրվեն Շվեյցարիայում նախատեսված համաշխարհային «խաղաղության գագաթնաժողովին»: Այս մասին հայտարարել է Ուկրաինայի նախագահի աշխատակազմի ղեկավար Անդրեյ Երմակը, գրում է «Ուկրաինսկայա պրավդան»։
Նա նշել է, որ պաշտոնական հրավերներն արդեն պատրաստ են և շուտով կուղարկվեն։ Ցուցակում Ռուսաստանը չկա։
«Սա շատ մեծ միջազգային իրադարձություն է: Առաջին գագաթնաժողովի նպատակը պետք է լինի այն ամենի արձանագրումը, ինչի մասին մենք խոսում էինք այս ամիսների ընթացքում դեսպանների, խորհրդականների մակարդակով»,- հավելել է ուկրաինացի պաշտոնյան:
Նա ընդգծել է, որ փաստաթուղթ է մշակվում, որը կարող է լինել այս հանդիպման արդյունքը։
«Առաջին հանդիպումից հետո մենք որոշ ժամանակ ենք վերցնում, որպեսզի աշխարհի պատասխանատու երկրների ծրագիր մշակենք՝ համատեղ կազմված և հիմնված «բանաձևի վրա», որը կենթադրի նաև ճգնաժամերի հաղթահարում, որոնք ստեղծել է այս պատերազմը»,- նշել է Երմակը։
Նա պարզաբանել է, որ Ռուսաստանի Դաշնության ներկայացուցիչներին հրավերներ կարող են ուղարկվել միայն երկրորդ «խաղաղության գագաթնաժողովին»։
Հավելենք, որ Ուկրաինայի նախագահ Վլադիմիր Զելենսկիի առաջարկած «խաղաղության բանաձևը» նախատեսում է ռուսական զորքերի ամբողջական դուրսբերում Ուկրաինայից և երկրի սահմանների վերականգնում 1991 թվականի սահմաններին համապատասխան։
Ռուսական իշխանությունները բազմիցս հայտարարել են, որ առանց Մոսկվայի մասնակցության Ուկրաինայի հարցով քննարկումները «ոչ մի տեղ չեն տանի»։
Շվեյցարիան ավելի վաղ հայտնել էր, որ մտադիր է մինչև ամառ Ուկրաինայի խնդրանքով համաշխարհային «խաղաղության գագաթնաժողով» կազմակերպել։ Շվեյցարիան համաձայնել է «խաղաղության գագաթնաժողով» կազմակերպել Ուկրաինայի խնդրանքով, ինչի մասին երկու պետությունները հայտարարել են հունվարի 15-ին Վլադիմիր Զելենսկիի՝ Բեռն կատարած այցի ժամանակ։
