25.06.2026 | 16:12
Միքայել արքեպիսկոպոս Աջապահյանի գործը նորից կքննվի․ վերաքննիչ բողոքը մասնակի բավարարվեց
Թուրքիայի տրանսպորտի նախարարը կրկին խոսել է «Զանգեզուրի միջանցքի» մասին
Քաղաքականություն
26.02.2024 | 13:46
Թուրքիայի տրանսպորտի ու ենթակառուցվածքների նախարար Աբդուլքադիր Ուրալօղլուն TRT Haber-ին տված հարցազրույցում կրկին անդրադարձել է տարածաշրջանում հաղորդակցությունների ապաշրջափակմանն ու այսպես կոչված «Զանգեզուրի միջանցքին»։ Նա ևս մեկ անգամ նշել է, թե այդ ճանապարհին այլընտրանք կա Իրանի տարածքով։
Ըստ թուրք պաշտոնյայի՝ «այդ ծրագրի շնորհիվ, որն իրականացվելու է Հայաստանով կամ Իրանով, թյուրքական երկրների միջև փոխադրումների ծավալը զգալիորեն կավելանա», այն կավելացնի նաև Բաքու-Թբիլիսի-Կարս երկաթուղով բեռնափոխադրումների ծավալը։
Ուրալօղլուն օրերս կրկին խոսել էր Իրանով ճանապարհի այլընտրանքի մասին։
«Հայաստանի տարածքով անցնող այդ երթուղու ուղղությամբ աշխատանքներ են տարվում։ Այն 43 կմ է։ Եթե հայկական կողմում խնդիր լինի, Ադրբեջանը կապեր ունի նաև Իրանի հետ՝ կապված իրանական տարածքով միջանցքի հնարավորության հետ։ Հետևաբար, կա երկու այլընտրանք, և երկուսն էլ հենց հիմա սեղանին են»,- ասել էր Ուրալօղլուն՝ նշելով, թե ադրբեջանական կողմը շարունակում է շինարարական աշխատանքները։
