15.09.2026 | 16:00
Ֆաշիստական ելույթ ունեցաք, դուք երիտբոլշևիկներ եք․ Վարդանյանը՝ Եղոյանին․ ՏԵՍԱՆՅՈՒԹ
Խոր փոս՝ Կիևյան կամրջի մոտ
21.02.2024 | 18:08
Factor.am-ը այսօր խոր փոս է արձանագրել Կիևյան կամրջի հարևանությամբ։ Երևանի քաղաքապետարանի լրատվության վարչությունից հայտնում են, որ այն «Թիմ Տելեկոմ Արմենիա»-ի դիտահորն է, և Արաբկիրի վարչական շրջանի ղեկավարությունը տեղյակ է դիտահորի քանդված լինելուց։
««Թիմ Տելեկոմ Արմենիան» չորս-հինգ օր է խնդրել դիտահորի հարցը կարգավորելու համար․ կոմունիկացիոն աշխատանքներ են իրականացվում այդտեղ», – ասացին լրատվության վարչությունից։
Այսօր մենք արձանագրեցինք, որ տարածքը թեև սահմանազատված է, սակայն այդ պահին աշխատանքներ չեն իրականացվում։
«Թիմ Տելեկոմ Արմենիայի» հասարակության կապերի բաժնի ղեկավար Գրիգորի Յուրինը Factor.am-ին փոխանցեց, որ այսօր կեսօրին են տեղեկացվել վթարի մասին, որից հետո աշխատակիցները մոտեցել են և արգելապատնեշներ ու զգուշացնող նշաններ տեղադրել։
«Քանի որ հետիոտնային գոտի է, կարող է` ինչ որ ծանր մեքենա եկել է, կանգնել, չի դիմացել ծածկը, այդ պատճառով է տեղի ունեցել վթարը։ Հիմա մեզ ծանր տեխնիկա է հարկավոր, որը հավանաբար հենց վաղը կմոտեցնենք և կվերացնենք խնդիրը»,- ասաց Գրիգորի Յուրինը` հավելելով, որ հաղորդակցուղիները պատահարի հետևանքով չեն վնասվել։
Անի Թամրազյան
