Թաքնված «ականներ»՝ Երևանի փողոցներում. փոսերն աղի՞, թե՞ վատ աշխատանքի հետևանք են. ՏԵՍԱՆՅՈՒԹ

Մայրաքաղաքի տարբեր փողոցներում հսկայական փոսերն այլևս նորություն չեն և զարմանք չեն հարուցում․ վարորդները հիմնականում արդեն գիտեն՝ փողոցի որ հատվածում ինչ մեծության փոս կա։ Լենինգրադյան փողոցում, օրինակ, փոսերն այնքան շատ են, որ քաղաքացիներն են ստիպված եղել դրանցում ավազ լցնել, որպեսզի պատահարներ չգրանցվեն։

Սարի թաղի 15 փողոցում էլ մեկ շաբաթից ավելի է՝ մի մեծ փոս կա։ Քաղաքացիների խոսքով՝ թաղապետարանի աշխատակիցները փայտեր են դրել և ժապավենով փաթաթել։ Մեքենաները հազիվ են շրջանցում փոսը, իսկ մինչ կարմիր ժապավեն փաթաթելը՝ մի քանի պատահար է գրանցվել։

Փոս չէ, անդունդ է՝ ասում են բնակիչները։ Նրանցից մեկը չնկարահանվելու պայմանով ասաց, որ մեկ տարի առաջ էլ նման խնդիր եղել է, վերանորոգել են, իսկ հիմա գոյացած փոսի մեջ անվադող ու քարեր են դրել։

Ակտիվիստ Արթուր Չախոյանն ասում է՝ ասֆալտապատումն անորակ են անում, ինքն անցյալ տարվանից է բարձրաձայնում այդ մասին։

«Ամբողջ Երևանով մեկ են փոսերը, քաղաքապետարանի անգործությունն ու բացթողումն է, ճաքալցումներ ու մշակումներ չեն արել։ Եթե որակով անեին, մեկ տարի հետո չէր կարող ասֆալտը քանդվել»,- ընդգծում է Չախոյանը։

Էրեբունի վարչական շրջանի ղեկավարի աշխատակազմից ասում են՝ տեղյակ են խնդրից․ կոմունալ բաժնից Factor TV-ին փոխանցեցին, որ մեկ տարի առաջ «Վեոլիա ջուր»-ն է վթարավերականգնողական աշխատանքներ իրականացրել, բայց թաղապետարանը ժամանակավոր լուծում կտա՝ մինչև հիմնական ասֆալտապատումը։

Քաղաքապետ Տիգրան Ավինյանն օրերս ասաց՝ ճանապարհների փոսերը կլցնեն, միայն թե եղանակային պայմանները դեռ թույլ չեն տալիս, նաև փորձեց բացատրել, թե ինչու են այդքան փոսեր առաջացել։

«Մեծ ծավալի աղ ենք ցանել այս տարի, որն այդքան էլ տեսանելի չէ, և աղն ունի ճանապարհները քայքայելու հատկություն»,- բացատրեց Ավինյանը։

Արթուր Չախոյանն էլ ասում է՝ ամեն ինչ բարդել եղանակային պայմանների վրա այնքան էլ ազնիվ չէ, առանց լավ եղանակի սպասելու՝ ժամանակավոր լուծումներ են պետք։

«Ամեն տարի աշխարհով մեկ փողոցներն աղով մշակում են, ամեն երկրում էլ փոսեր լինում են, հարցն այն է, թե երբ են նորոգում»,- նշում է ակտիվիստը։

Ժամանակավոր փոսալցումներ անում ենք, պարզապես ոչ բոլոր վարչական շրջաններում միաժամանակ՝ ասում է քաղաքապետարանի աշխատակազմի շինբարեկարգման վարչության պետի պաշտոնակատար Տիգրան Գեղամյանը։ Ընդգծում է՝ հերթականությամբ ենք անում, սկիզբը տրվել է Կենտրոն վարչական շրջանից։

Այս տարի քաղաքապետարանը միայն փոսալցման աշխատանքների համար հատկացնելու է շուրջ 700 միլիոն դրամ։ Փոսանորոգման ու ճաքալցման մրցույթները հայտարարվել են։

Գեղամյանը հերքում է այն պնդումները, թե ասֆալտապատումն անորակ է արվում, և կան փոսեր, որ անցյալ տարվանից դեռ չեն փակվել։ Մինչդեռ ամիսներ առաջ Տիգրան Ավինյանն անձամբ էր բարձրաձայնել այդ մասին։

«Մետրո պիտի կառուցենք Աջափնյակի, մի ամիս է՝ փոս չենք կարողանում լցնենք քաղաքում»,- ասել էր քաղաքապետ Տիգրան Ավինյանը։

Ե՞րբ, ի վերջո, մայրաքաղաքի բոլոր փոսերը կլցվեն, կա՞ն հստակ ժամկետներ․ Տիգրան Գեղամյանը մեկ պատասխան ունի՝ փոսալցման աշխատանքներն անընդհատ են։

Մանրամասները՝ տեսանյութում։

Արփի Հակոբյան