Փաշինյանի պատասխանը Ալիևի սպառնալիքներին․ խաղաղության պայմանագի՞ր, թե նոր պատերազմի սկիզբ․ ՏԵՍԱՆՅՈՒԹ

Նիկոլ Փաշինյանը 4 զոհի և 1 զինծառայողի վիրավորման հանգեցրած Ադրբեջանի «Հատուցում» գործողությունը համարել է ռազմական հարկադրանքի քաղաքականություն։ Այսօր կառավարության նիստում վարչապետն ասաց, թե Ադրբեջանը շարունակում է վարել՝ «այն, ինչ ուզում եմ, տվեք ինձ բանակցային եղանակով, հակառակ դեպքում, ես այն կվերցնեմ պատերազմով» քաղաքականությունը։

Ադրբեջանը, չսպասելով հրադադարի ռեժիմի ենթադրյալ խախտման վերաբերյալ ՀՀ ՊՆ-ի հետաքննության արդյունքին, արյունալի միջադեպ սադրեց Ներքին Հանդի ուղղությամբ։ Սակայն Փաշինյանի քննադատությունն Ադրբեջանի հասցեին ո՛չ միայն փետրվարի 13-ի մասին է։ Փաշինյանն այսօր ասում էր, որ Ադրբեջանը պարբերաբար խոսում է «4 գյուղերի տարածքների մասին», բայց, միևնույն ժամանակ, հրաժարվում է ընդունել, որ ադրբեջանական օկուպացիայի տակ են գտնվում Հայաստանի 31 ոչ անկլավային գյուղերի կենսական նշանակության տարածքներ։

Արդյո՞ք Հայաստանի վարչապետն ակնարկում է, որ Ադրբեջանը կարող է լայնածավալ գործողության գնալ՝ «8 անկլավներ ազատագրելու» կեղծ հիմնավորմամբ։ Արդյո՞ք սահմանազատման հանձնաժողովների աշխատանքը մտել է փակուղի։ Ինչո՞ւ Ալիևը որոշեց 5-րդ անգամ Ադրբեջանի նախագահությունը ստանձնել՝ նույն օրը արյուն հեղելով սահմանին։ Ո՞րն է Ադրբեջանի երկարաժամկետ պլանը։

Factor TV-ի տաղավարում հրավիրված քննարկմանը մասնակցում են «Ազատ Հայաստան» նախաձեռնության ղեկավար Էդգար Առաքելյանը, Ազգային անվտանգության և ռազմական հարցերով փորձագետ, քաղաքագիտության դոկտոր Հրաչյա Արզումանյանը, Դեմոկրատական այլընտրանք կուսակցության ղեկավար Սուրեն Սուրենյանցը, քաղաքագետ Լիլիթ Դալլաքյանը, «Լուսավոր Հայաստան» կուսակցության անդամ Անի Սամսոնյանը։

Մանրամասները՝ տեսանյութում։