Ղազախստանում համացանցում են հայտնվել ուսանողների անձնական տվյալները, այդ թվում՝ կուսության մասին տեղեկությունները

Ղազախստանում համացանցում տարածվել են «Ալ-Ֆարաբի Ղազախստանի ազգային համալսարանի» ուսանողների անձնական տվյալները և բժշկական զննության արդյունքները։ Համալսարանի ղեկավարությունը ներքին հետաքննություն է սկսել, Ալմաթի քաղաքի դատախազությունը քրեական գործ է հարուցել այս փաստի առթիվ՝ անձնական կյանքի գաղտնիությունը խախտելու համար (Ղազախստանի Հանրապետության քրեական օրենսգրքի 147-րդ հոդվածի 5-րդ մաս): Այս մասին գրում է «Current time»-ը։

Հրապարակված աղյուսակում ներկայացված են, մասնավորապես, աղջիկների անուն-ազգանունները, հարկային հաշվառման համարները, հեռախոսահամարներն ու ախտորոշումները։ Սյունակներից մեկում կա նաև տեղեկատվություն այն մասին, թե ստուգվածներից ով է կույս։

Նման տվյալների հայտնվելը Ղազախստանում հասարակական լայն ընդվզում է առաջացրել։ «НеМолчиKZ» հիմնադրամի ղեկավար Դինա Սմաիլովան դատապարտել է ուսանողների մասին տեղեկատվության տարածումը։

«Սա մասնավոր կյանքի գաղտնիության կոպիտ խախտում է, ոչ ոք իրավունք չունի կուսության ստուգում անցկացնել, հետո ո՞ւմ եք դա ուղարկում, ո՞վ է այդքան հետաքրքրված կույս ուսանողուհիներով»,- գրել է նա իր Telegram-ալիքում։

Համալսարանից հայտնել են, որ փետրվարի 6-ին բժշկական կենտրոնի բուժքույրը, որը «համալսարանին բժշկական ծառայություններ է մատուցում պայմանագրի հիման վրա, WhatsApp մեսենջերի միջոցով Մեխանիկա և մաթեմատիկա ֆակուլտետի դեկանատից մասնագետին է ուղարկել նույն ֆակուլտետի 3-րդ և 4-րդ կուրսի ուսանողների մասին տեղեկություններ պարունակող աղյուսակը, որպեսզի ապահովվի նրանց ֆլյուորոգրաֆիկ հետազոտություն անցնելը»։ Արդյունքում բժշկական գաղտնիք կազմող տեղեկատվությունը փոխանցվելուց հետո հայտնվել է ցանցում:

Համալսարանը ստուգումներ է սկսել։ Թվային զարգացման նախարարությունը կոչ է արել ուսանողներին, ում անձնական տվյալները նշված են ցուցակներում, դիմել իրենց՝ «հանցագործներին վարչական պատասխանատվության ենթարկելու» հայտարարությամբ։