05.08.2026 | 14:51
Ինչ եղանակ է սպասվում առաջիկա օրերին
Էրդողանը 12 տարվա մեջ առաջին անգամ Եգիպտոս է մեկնել
14.02.2024 | 21:01
Թուրքիայի նախագահ Ռեջեփ Թայիփ Էրդողանը փետրվարի 14-ին պետական այցով ժամանել է Եգիպտոս։ Կահիրեի միջազգային օդանավակայանում Էրդողանին և նրան ուղեկցող պատվիրակությանը դիմավորել են Եգիպտոսի նախագահ Աբդել Ֆաթահ Էլ-Սիսին և Թուրքիայի դեսպան Սալիհ Մութլու Շենը, հայտնում են թուրքական լրատվամիջոցները։
Էրդողանին ուղեկցում են նրա կինը՝ Էմինե Էրդողանը, ԱԳ նախարար Հաքան Ֆիդանը, ֆինանսների նախարար Մեհմեթ Շիմշեքը, ՊՆ ղեկավար Յաշար Գյուլերը և այլ պաշտոնյաներ։
Այցի ընթացքում Ռեջեփ Թայիփ Էրդողանը երկկողմ և ընդլայնված կազմով բանակցություններ կվարի Եգիպտոսի իր գործընկեր Աբդելֆաթահ ալ Սիսիի հետ։ Հանդիպման ավարտին առաջնորդները հանդես կգան համատեղ մամուլի ասուլիսով։
Հավելենք, որ Էրդողանի մեկօրյա այցը եգիպտա-թուրքական առաջնորդների առաջին գագաթնաժողովն է 2012 թվականից ի վեր: 2013 թվականին Եգիպտոսում տեղի ունեցած ռազմական հեղաշրջումից հետո, որը տապալել էր «Մահմեդական եղբայրների» կառավարությունը՝ Թուրքիայի դաշնակից Մուհամեդ Մուրսիի գլխավորությամբ, Կահիրեի և Անկարայի միջև հարաբերությունները կտրուկ սրվել էին։
Նախորդ տարի հունիսին Էրդողանի վերընտրվելուց հետո երկու երկրները հուլիսին լիովին վերականգնեցին դիվանագիտական հարաբերությունները: Այնուհետև նոյեմբերին Էրդողանը և Սիսին հանդիպել էին Հնդկաստանում G-20-ի գագաթնաժողովի շրջանակներում։
