ՌԴ ԱԳՆ-ն սպառնացել է «կոշտ պատասխան տալ» Արևմուտքում ռուսական սառեցված ակտիվների բռնագրավման դեպքում

Մոսկվան նախազգուշացրել է Արևմուտքին, որ «չափազանց կոշտ պատասխան» կտա, եթե Միացյալ Նահանգները և Եվրամիությունը բռնագրավեն հարյուր միլիարդավոր դոլարների սառեցված ռուսական ակտիվները, գրում է BBC-ի ռուսական ծառայությունը։

2022 թվականի փետրվարին Ուկրաինա ռուսական լայնամասշտաբ ներխուժման սկզբից ի վեր ԱՄՆ-ն ու նրա դաշնակիցներն արգելել են գործարքները Ռուսաստանի Կենտրոնական բանկի և Ֆինանսների նախարարության հետ՝ սառեցնելով մոտ 300 միլիարդ դոլար արժողությամբ ռուսական ինքնիշխան ակտիվներն Արևմուտքում: Այնուամենայնիվ, հետագա որոշումներ չեն կայացվել՝ ինչ անել այս ակտիվների հետ:

Երկուշաբթի ԵՄ-ն օրենք է ընդունել ռուսական Կենտրոնական բանկի սառեցված ակտիվներից ստացված շահույթները բռնագրավելու մասին, ինչն առաջին կոնկրետ քայլն է դաշինքի նպատակին հասնելու՝ այդ գումարներն օգտագործելու Ուկրաինայի վերակառուցման համար:

«Դա գողություն է։ Սա մի բանի յուրացում է, որը ձեզ չի պատկանում»,- մեկնաբանելով այս որոշումը՝ ասել է ՌԴ ԱԳՆ պաշտոնական ներկայացուցիչ Մարիա Զախարովան։

Նա սպառնացել է, որ պատասխան միջոցները կլինեն «չափազանց կոշտ»՝ չհստակեցնելով, թե կոնկրետ ինչ գործողություններ է պատրաստվում ձեռնարկել Մոսկվան։

«Հաշվի առնելով, որ մեր երկիրը սա որակել է որպես գողություն, վերաբերմունքը  ծկլինի գողերի նման»,- նշել է Զախարովան։

Ավելի վաղ Ռուսաստանը հայտարարել էր, որ եթե իր ունեցվածքը բռնագրավվի, ի պատասխան կարող է կալանք դրվել ամերիկյան, եվրոպական և այլ ակտիվների վրա։