30.05.2026 | 10:50
ՌԴ-ն թույլատրել է հայկական երկու ձկնաբուծական ընկերության արտադրանքի ներմուծումը․ ՍԱՏՄ
Իրանում ՌԴ դեսպանն ասել է, թե Թեհրանում ու Մոսկվայում «մտավախությամբ են նայում արևմտյան երկրների՝ ՀՀ-ում ստեղծված իրավիճակից օգտվելու փորձերին»
Քաղաքականություն
13.02.2024 | 17:13
Թեհրանում, ինչպես և Մոսկվայում, մտավախությամբ են նայում արևմտյան երկրների կողմից Հայաստանում ստեղծված իրավիճակից օգտվելու փորձերին։ Այս մասին ՌԻԱ Նովոստիի հետ զրույցում հայտարարել է Իրանում ՌԴ արտակարգ և լիազոր դեսպան Ալեքսեյ Դեդովը:
«Թեհրանում, ինչպես Մոսկվայում, մտավախությամբ են նայում արևմտյան երկրների՝ Հայաստանում ստեղծված իրավիճակից օգտվելու փորձերին, որպեսզի ավելի բորբոքեն իրավիճակը ոչ միայն երկրում, այլև ամբողջ կովկասյան տարածաշրջանում։
Մենք համագործակցում ենք Հարավային Կովկասի «3+3» խորհրդատվական տարածաշրջանային հարթակի շրջանակում։ Խոսքը երեք երկրների՝ Ադրբեջանի, Հայաստանի և Վրաստանի ու երեք հարևանների՝ Ռուսաստանի, Թուրքիայի և Իրանի մասին է։ Խոսքը, մասնավորապես, գործնական համագործակցության նախագծերի մասին է՝ տնտեսություն, էներգետիկա, առևտուր, տրանսպորտ, տեղեկատվական և հաղորդակցական տեխնոլոգիաներ, բնական ռեսուրսներ, հումանիտար ոլորտ, կրթություն, մշակույթ, զբոսաշրջություն»,- ասել է դեսպանը։
Նրա խոսքով՝ Իրանն Անդրկովկասում ստեղծված իրավիճակի շուրջ համագործակցում է Ռուսաստանի հետ։
«Իրանը միշտ եղել է Անդրկովկասում կարևոր դերակատար։ Մենք տեսնում ենք, որ իրանական կողմը պատրաստ է և այս տարածաշրջանում շփվում է Ռուսաստանի հետ։ Մենք ունենք նմանատիպ դիրքորոշում, որ բոլոր հակասությունները, բոլոր հակամարտություններն այս տարածաշրջանում պետք է լուծվեն խաղաղ քաղաքական, դիվանագիտական ջանքերով և հենց տարածաշրջանի երկրների կողմից՝ առանց արտաքին ուժերի միջամտության, որոնց ջանքերը, որպես կանոն, ինչպես տեսնում ենք պրակտիկայից, միայն ավելի մեծ լարվածության կհանգեցնեն»,- հայտարարել է Դեդովը:
