Քաղաքականություն
09.02.2024 | 15:51
Ադրբեջանի նախագահ Իլհամ Ալիևի օգնական Հիքմեթ Հաջիևը երկրում նախագահական արտահերթ ընտրություններից առաջ գերմանական ZDF-ին տված հարցազրույցում խոսել է նաև Հայաստանի նկատմամբ Բաքվի տարածքային պահանջների մասին։
Մասնավորապես, պատասխանելով ՀՀ-ի նկատմամբ Ալիևի հնչեցրած անհիմն տարածքային պահանջների, ռազմական ագրեսիայի սպառնալիքի, Հայաստանից տարածքներ գրավելու մասին հարցին՝ Հաջիևն ասել է, թե միջազգային լրատվամիջոցները, իբր, «իր նախագահին ճիշտ չեն հասկացել»։
«Իմ նախագահն այդպես չի ասել, և ես ափսոսում եմ, որ դա սխալ է մեկնաբանվել միջազգային լրատվամիջոցներում։ Սկզբնական համատեքստում նա այլ բան նկատի ուներ։ Ադրբեջանցիները միշտ երկար ժամանակ ապրել են ներկայիս Հայաստանում։ Իմ նախնիներն ապրել են Հայաստանում։ Խոսքը միջանձնային շփումների մասին է։ Ադրբեջանցիները նույնպես պետք է իրավունք ունենան այցելել այս տարածք, օրինակ՝ մշակութային վայրեր և գերեզմանատներ։ Սա չի նշանակում տարածքային պահանջներ Հայաստանի նկատմամբ։ Ինչ վերաբերում է «Զանգեզուրի միջանցքին», մենք հույս ունենք, որ Հայաստանը կկատարի իր պարտավորությունները։ 2020 թվականի եռակողմ համաձայնագրով Հայաստանը համաձայնել է թույլ տալ ադրբեջանցիներին Ադրբեջանից անխափան մուտք գործել Նախիջևան։ Բայց մինչ օրս Հայաստանը չի կատարել իր պարտավորությունը»,- ասել է Ալիևի օգնականը։
Խոսելով Հայաստանի դեմ ռազմական ուժ կիրառելու մասին՝ նա նշել է, որ Բաքուն նման նպատակ չունի։
«Մեզ համար ցանկացած ռազմական գործողություն ավարտված է, քանի որ Ադրբեջանը վերականգնել է իր տարածքային ամբողջականությունը։ Ադրբեջանը գործել է միայն Ադրբեջանի Հանրապետության տարածքում։ Չպետք է լինեն երկակի ստանդարտներ և ընտրովի վերաբերմունք տարածքային ամբողջականության նկատմամբ»,- հայտարարել է Հիքմեթ Հաջիևը։
Էմմա Չոբանյան
