14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
ԱՊՀ գլխավոր քարտուղարը հայտարարել է, թե Ալիևի հաղթանակը «կարող է նպաստել տարածաշրջանում երկարաժամկետ խաղաղությանն ուղղված ջանքերի ակտիվացմանը»
Քաղաքականություն
08.02.2024 | 16:51
Ադրբեջանում փետրվարի 7-ին կայացած արտահերթ նախագահական ընտրությունները «մրցակցային էին և այլընտրանքային, գործող նախագահ Իլհամ Ալիևի համոզիչ հաղթանակն ապահովել է քաղաքացիների շրջանում նրա անհերքելի հեղինակությունը»։ Այս մասին ասել է ԱՊՀ գլխավոր քարտուղար Սերգեյ Լեբեդևը, որը գլխավորում է կազմակերպության դիտորդական առաքելությունը այս ընտրություններում, գրում են ադրբեջանական լրատվամիջոցները։
Նա նշել է, որ ընտրություններում Ադրբեջանի գործող նախագահ Իլհամ Ալիևի հաղթանակը «կարող է նպաստել տարածաշրջանում երկարաժամկետ խաղաղության հաստատմանն ուղղված ջանքերի ակտիվացմանը»։
«Ինձ թվում է, որ այս հաղթանակը կնպաստի նրան, որ լրացուցիչ ջանքեր գործադրվեն (Հայաստանի և Ադրբեջանի միջև) բանակցային գործընթացում՝ տարածաշրջանում համաձայնության հասնելու համար: ԱՊՀ բոլոր երկրները չափազանց շահագրգռված են խաղաղության վերականգնման այս գործընթացի հաջող ավարտով։ Դա և՛ տարածաշրջանի երկրների շահերից է բխում, և՛ ամբողջ Համագործակցության»,- ասել է Լեբեդևը։
Նա հավելել է, որ Ռուսաստանն ակտիվորեն մասնակցում է այս գործընթացին և փորձում է նպաստել խաղաղության վերականգնմանը։
Հիշեցնենք, որ ըստ Ադրբեջանի ԿԸՀ տվյալների՝ գործող նախագահ Իլհամ Ալիևը նախօրեին անցկացված արտահերթ նախագահական ընտրություններում հավաքել է ձայների 92,05 տոկոսը՝ քվեաթերթիկների 93,35 տոկոսի մշակումից հետո։
Ադրբեջանի ընդդիմությունն իր հերթին հայտարարել է, որ չի ճանաչում ընտրությունների արդյունքները՝ հայտարարելով, որ դրանք չեն արտացոլում ժողովրդի կամքն ու տեղի են ունեցել ընտրախախտումների պայմաններում։
Էմմա Չոբանյան
