Աթաթուրքի լուսանկարով կրծքանշանները հրաժարվել կրող սպաներին հեռացել են Թուրքիայի բանակից

Թուրքիայի ցամաքային զորքերի հրամանատարության կարգապահական խորհուրդը հունվարի 18-ին որոշում է կայացրել աշխատանքից հեռացնել յոթ սպաների, որոնք վեճի են բռնվել Թուրքիայի Հանրապետության հիմնադիր Մուստաֆա Քեմալ Աթաթուրքի լուսանկարով կրծքանշաններ կրելու հետ կապված ռազմական ակադեմիայում արարողության ժամանակ։ Այս մասին հայտնում է 10Haber-ը, որին վկայակոչում է Turkish Minute-ը։

Դեկտեմբերին թուրքական լրատվամիջոցները հայտնել էին, որ Ստամբուլի Թուզլայի հետևակային դպրոցի հրամանատարության լեյտենանտների միջև վիճաբանություն է տեղի ունեցել, երբ նրանցից ոմանք հրաժարվել են կրել Աթաթուրքի կրծքանշանները նոյեմբերի 10-ին նրա մահվան 85-րդ տարելիցին նվիրված արարողության ժամանակ և, իբր, դրանք գետին են նետել։

Միջադեպին անդրադարձել էին նաև իշխանամետ լրատվամիջոցները, որոնք առաջին էջի վերնագրերում օգտագործել էին «լեյտենանտական խունտա» տերմինը և պնդել, որ կուրսանտները դպրոցի սև ցուցակում են:

Իշխանամերձ Yeni Şafak-ն էլ պնդում էր, որ մի խումբ լեյտենանտներ հարձակվել են իրենց գործընկերների վրա արարողությունից հետո, որի ժամանակ որոշ սպաներ չեն կրել Աթաթուրքի կրծքանշանները՝ պնդմամբ, որ քորոցների պակաս կա։ Խումբը վիրավորական արտահայտություններ է հնչեցրել, իսկ ավելի ուշ հարձակվել զորանոցի մյուս սպաների վրա։ Հարձակման ենթարկված սպաները դիմում են ներկայացրել, քրեական գործ է հարուցվել և հետաքննություն է սկսվել։

Պաշտպանության նախարարությունը մամուլի հրապարակումներից հետո գրավոր հայտարարություն է տարածել, որում ասվում է, որ դեպքի առնչությամբ ընթացող դատավարական հետաքննությունից բացի՝ նաև վարչական հետաքննություն  է սկսվել։

Ըստ 10Haber-ի՝ սպաները պաշտպանվել են ցամաքային զորքերի հրամանատարության բարձրագույն կարգապահական խորհրդի առջև, որը հրավիրվել է հունվարի 18-ին։ Խորհուրդը որոշում է կայացրել աշխատանքից հեռացնել բոլոր յոթ սպաներին: Եթե ՊՆ-ն հաստատի որոշումը, ապա յոթ լեյտենանտների պաշտոնանկությունը վերջնական կլինի։

Էմմա Չոբանյան