01.05.2026 | 11:16
Հայտնի են այս տարվա «Ոսկե ծիրան»-ի անցկացման ժամկետները
Կիևի քաղաքապետ Վիտալի Կլիչկոն դեմ է արտահայտվել Զալուժնիի հրաժարականին
Քաղաքականություն
05.02.2024 | 19:20
Կիևի քաղաքապետ Վիտալի Կլիչկոն հանդես է եկել ի պաշտպանություն Ուկրաինայի Զինված ուժերի գլխավոր հրամանատար Վալերի Զալուժնիի և կոչ է արել Ուկրաինայի իշխանություններին դադարեցնել «քաղաքական ինտրիգները»։ Այս մասին նա գրառում է արել Տելեգրամ-ալիքում։
Կլիչկոն կարծիք է հայտնել, որ հիմնականում Զալուժնիի շնորհիվ «ուկրաինացիները իսկապես հավատում էին» Ուկրաինայի զինված ուժերին։ Նրա խոսքով՝ պատերազմի ընթացքում գերագույն գլխավոր հրամանատարը «շատ դժվար պահերի միջով է անցել»։
«Բայց, ցավոք, այսօր այն պահն է, երբ քաղաքականությունը կարող է գերակայել ողջախոհության և պետության շահերի նկատմամբ։ Եվ այս պահը կախված չէ Զալուժնիից։ Հուսով եմ, որ կառավարությունը հասկանում է այժմ ձեռնարկվող քայլերի լրջությունը և պատասխանատվության ողջ չափը։ Որովհետև այսօր, երբ Ուկրաինան բառացիորեն պայքարում է իր գոյության համար, գլխավորը բանակի մարտունակությունն ու համախմբվածությունն է և հասարակության միասնությունը։ Արդյո՞ք ազդարարված փոփոխությունները միտված են դրան։ Հասարակությունը համոզված չէ։Եվ դա պետք է հաշվի առնել։ Եվ վերջապես դադարեցնել քաղաքական ինտրիգներն ու ներքին պայքարը»,- գրել է Կլիչկոն՝ նշելով, որ այսօր պետք է պայքարել մեկ բանի՝ Ուկրաինայի հաղթանակի համար։
Հիշնենք, որ Ուկրաինայի նախագահ Վլադիմիր Զելենսկին բանակի հրամանատարին փոխարինելու մասին առաջին անգամ հրապարակային խոսել էր իտալական Rai հեռուստաալիքի հետ հարցազրույցում։
«Զալուժնի՞ն։ Մեզ պետք է վերափոխում, ղեկավարության փոփոխություն՝ ոչ միայն ռազմական։ Այդ հարցը վերաբերում է մարդկանց, որոնք պետք է ղեկավարեն Ուկրաինան։ Անհրաժեշտ է նոր սկիզբ»,- ասել էր Զելենսկին՝ պատասխանելով ԶՈՒ գերագույն գլխավոր հրամանատարի հնարավոր հրաժարականի մասին լուրերը մեկնաբանելու հարցին։
Էմմա Չոբանյան
