Ունենք մտավորականներ, որոնց հետևից կգնան, բայց նրանք դուրսպրծուկ չեն, տե´ր եղեք այդ տեսակին. Բարսեղ Թումանյան․ ՏԵՍԱՆՅՈՒԹ

«Ես աշխատել եմ չկոտրվել և չեմ համակերպվել, որ Արցախը կորցրել եմ: Իհարկե, դա մի ծանրագույն խնդիր է, որը երեսուն տարիների ընթացքում փակուղի էր մտել: Պարզապես քիչ աշխատանք տարվեց աշխարհին հիմնավորելու համար, որ Արցախը հայկական է, մենք էլ օկուպանտ չենք: Մենք մեզ պատվով չպահեցինք: Պետք էր հասկանալ, որ ամեն հաղթանակ կարող է պարտության սկիզբ լինել: Մեր պայքարը մեր, մեր թուլության դեմ պետք է լինի»,- Factor TV-ի հետ զրույցում տեսակետ է հայտնում ՀՀ ժողովրդական արտիստ, օպերային երգիչ Բարսեղ Թումանյանը:

Նրա խոսքով` մենք կլինենք ուժեղ պետություն, եթե էլիտան լինի մեր վերադասը. «Բայց մեր էլիտան անտեսված է, մեծարված չէ: Ասում են`պետք է սպասել Փոքր Մհերի վերադարձին: Ոչնչի սպասել պետք չէ. Փոքր Մհերը երբեք չի գալու և մեր դուռը չի ծեծելու, նա պետք է ծնվի մեր մեջ: Այսօր մենք ունենք մտավորականներ, որոնց հետևից մարդիկ կգնան, միայն թե նրանք դուրսպրծուկ չեն, ժողովուրդը պետք է ընտրի, տե´ր դարձեք նրանց»:

Բարսեղ Թումանյանը խոսում է նաև վերջին շրջանում կրկին օրակարգային դարձած Հայաստանի խորհրդանիշները փոխելու թեմայից: Նրա համոզմամբ`ինչպիսի պետություն որ պատրաստվում ես կառուցել, խորհրդանիշներն էլ պետք է դրա արտացոլանքը լինեն և ներդաշնակ մնան այդ գաղափարի հետ. «Մենք պետք է վերանայենք մեր այսօրվա խորհրդանիշները: Սիմվոլները խոսքից ու օրենքից հզոր են: Պետք է մասնագետները միանան և այդ հարցով զբաղվեն: Օրինակ`օրհներգը պետք է լինի ոգեշնչող, բայց ոչ էմոցիոնալ, այն տրամաբանություն պետք է ունենա»:

Մանրամասները` տեսանյութում:

Աննա Բաբաջանյան