Քաղաքականություն
01.02.2024 | 23:10
Թուրքիան շարունակում է հետաքրքրված լինել 40 Eurofighter Typhoon կործանիչների գնմամբ։ Այս մասին ասել է Թուրքիայի ՊՆ պաշտոնյան, գրում է Al Arabiya-ն ՝ վկայակոչելով Reuters-ին։
Նոյեմբերին Թուրքիան հայտարարել էր, որ երկիրը բանակցություններ է վարում Մեծ Բրիտանիայի և Իսպանիայի հետ կործանիչները գնելու համար, թեև Գերմանիան դեմ էր այդ գաղափարին:
Անցյալ շաբաթ ԱՄՆ նախագահ Ջո Բայդենի վարչակազմը պաշտոնապես ծանուցել էր Կոնգրեսին F-16-երի վաճառքը շարունակելու մտադրության մասին։
40 Lockheed Martin F-16 ինքնաթիռների և մոտ 80 արդիականացման սարքերի վաճառքի մասով այս որոշումը հետևեց Անկարայի կողմից Շվեդիայի՝ ՆԱՏՕ-ին անդամակցության վավերացմանը։
Թուրքիայի ՊՆ պաշտոնյան, ցանկանալով մնալ անանուն, լրատվամիջոցին ասել է, որ Անկարան չի ակնկալում, որ Կոնգրեսը կխոչընդոտի F-16-ի վաճառքը, սակայն դեռ ցանկանում է գնել Eurofighter Typhoon կործանիչները։
«Մենք դեռ շահագրգռված ենք, ակնկալում ենք կոնսորցիումի անդամ Գերմանիայի դրական մոտեցումն այս հարցում»,- նշել է պաշտոնյան։
Eurofighter Typhoon ինքնաթիռները արտադրվում են Գերմանիայի, Մեծ Բրիտանիայի, Իտալիայի և Իսպանիայի կոնսորցիումի կողմից՝ ի դեմս Airbus, BAE Systems և Leonardo ընկերությունների։
Էմմա Չոբանյան
