13.12.2025 | 14:32
Վահագն Խաչատուրյանն Աշխաբադում զրույցներ է ունեցել մի շարք երկրների նախագահների հետ
Ալիևը հայտարարել է, թե խաղաղության կարելի է հասնել, եթե փոփոխություններ կատարվեն ՀՀ Սահմանադրության մեջ
Քաղաքականություն
01.02.2024 | 15:35
Ադրբեջանի նախագահ Իլհամ Ալիևը Միջխորհրդարանական միության գլխավոր քարտուղար Մարտին Չունգոնգի հետ հանդիպմանը բողոքել է ԼՂ հակամարտության կարգավորմամբ զբաղվող ԵԱՀԿ Մինսկի խմբի գործունեությունից՝ նշելով, թե «Մինսկի խումբը 28 տարի ներգրավված է եղել հակամարտության կարգավորման գործընթացում, սակայն արդյունք չի գրանցվել, ադրբեջանական հողերը չեն ազատագրվել օկուպացիայից»։
Նա շարունակել է նաև Հայաստանի հասցեին մեղադրանքներ հնչեցնել՝ նշելով, թե 44-օրյա պատերազմի ավարտից հետո Երևանը, իբր, օգնել է Արցախին «ռազմական միջոցներով ու չի կատարել եռակողմ հռչակագրի շրջանակում ստանձնած մի շարք պարտավորությունները»։
Ալիևն ասել է, որ Ադրբեջանի և Հայաստանի միջև դե ֆակտո խաղաղություն է, և երկու երկրների սահմանին մի քանի ամիս խաղաղ իրավիճակ է տիրում։ Բայց այդ գործընթացն իր տրամաբանական ավարտին հասցնելու համար անհրաժեշտ է խաղաղության պայմանագիր կնքել և «վերջ դնել Ադրբեջանի դեմ Հայաստանի տարածքային պահանջներին»։
Նա նշել է, թե «Հայաստանի Անկախության հռչակագիրն ուղիղ կոչեր է պարունակում Ադրբեջանի Ղարաբաղի տարածաշրջանը Հայաստանին միավորելու և Ադրբեջանի տարածքային ամբողջականության խախտման վերաբերյալ, և այդ փաստաթղթին հղումներն արտացոլված են նաև Հայաստանի Սահմանադրության մեջ։ Բազմաթիվ վերապահումներ կան, որոնք չեն ճանաչում Ադրբեջանի ինքնիշխանությունը Ղարաբաղի նկատմամբ Հայաստանի այլ նորմատիվ իրավական փաստաթղթերում»։
Ալիևը դժգոհել է Բաքվի դեմ ՀՀ-ի միջազգային դատարաններում ներկայացրած հայցերից՝ նշելով, թե «միջազգային ատյաններում Հայաստանի հայցերն ընդդեմ Ադրբեջանի հիմնված են այնպիսի հարցերի վրա, ինչպիսիք են Հայաստանի կողմից Ադրբեջանի ինքնիշխանությունն ու տարածքային ամբողջականությունը չճանաչելը և Ղարաբաղի անջատումը Ադրբեջանից»։ Նա ասել է, թե «խաղաղության կարելի է հասնել, եթե վերջ դրվի այդ պնդումներին, փոփոխություններ կատարվեն Հայաստանի Սահմանադրության մեջ և այլ նորմատիվ իրավական փաստաթղթերում»։
Ադրբեջանի նախագահը նաև հայտարարել է, թե Ֆրանսիան գործում է կրակին բենզին լցնելու սկզբունքով, տարածաշրջանում ապակառուցողական քաղաքականություն է վարում և Հայաստանին ռազմականացման տանում։ Նա ասել է, որ տարածաշրջանում լարվածության պատճառ է հանդիսանում Փարիզը, որը հակաադրբեջանական քաղաքականություն է վարում միջազգային տարբեր կազմակերպություններում և խորհրդարանական մակարդակով։
Անդրադառնալով ԵԽԽՎ-ից Ադրբեջանի պատվիրակությանը հեռացնելու որոշմանը՝ Ալիևն ասել է, թե նախաձեռնությունը հակաադրբեջանական է, չի ծառայում երկխոսությանը և, ընդհանուր առմամբ, հակասում է խորհրդարանական հարթակի ավանդույթներին։ Նա հայտարարել է, որ եթե ադրբեջանական պատվիրակության իրավունքները չվերականգնվեն, Բաքուն կվերանայի ԵԽ-ին և Մարդու իրավունքների եվրոպական դատարանին իր մասնակցության հարցը։
Էմմա Չոբանյան
