Չգիտեմ` որտեղի՞ց է այս քամին փչում. «Ելք» դաշինքի ավագանու անդամը` ՀՀԿ-ի՝ Արտակ Զեյնալյանին սատարելու մասին

Շուտով կմեկնարկի Երևանի ավագանու ընտրությունների պաշտոնական քարոզարշավը:

Դեռ վերջնական պարզ չէ, թե ի՞նչ ձևաչափով են մասնակցելու «Ելք » դաշինքի մաս կազմող երեք ուժերը: Հայտնի է, որ «Քաղաքացիական պայմանագիր » կուսակցությունը քաղաքապետի պաշտոնում մտադիր է առաջադրել դերասան և պրոդյուսեր Հայկ Մարությանի թեկնածությունը, իսկ «Հանրապետությունն» ու «Լուսավոր Հայաստանը» նախընտրելի թեկնածու են համարում Արդարադատության նախարար Արտակ Զեյնալյանին:

Մամուլը գրեց, թե Հանրապետականը կարող է սատարել «Հանրապետություն» կուսակցության ներկայացուցիչ Արտակ Զեյնալյանին:

Factor.am-ի հարցին` ինչպես դա կարող է ազդել Արտակ Զեյնալյանի վարկանիշի վրա, «Հանրապետություն » կուսակցության ներկայացուցիչ, Երևանի ավագանու «Ելք » խմբակցության անդամ Տիգրան Տեր-Մարգարյանը պատասխանեց. «Արտակ Զեյնալյանն ունի լուրջ կենսագրություն: Նա եղել է ազատամարտիկ, Առողջապահության նախարարի տեղակալ, զբաղվել է իրավապաշտպան գործունեությամբ: Պարոն Զեյնալյանի աշխատանքը տեսանելի և գնահատելի է մարդկանց կողմից: Նա չունի PR-ի կամ որևէ մեկի պաշտպանության կարիք:ՀՀԿ-ն չունի այն վարկանիշը, որ կարողանա ազդել: Դա սև PR-է: Չգիտեմ` որտեղի՞ց է այս քամին փչում: «Հանրապետությունն » ու «Լուսավոր Հայաստանը» դեռ շարունակում են ՔՊ-ի հետ բանակցել` ցանկանալով պահպանել դաշինքային ձևաչափը»,- վստահեցրեց «Հանրապետություն» կուսակցության ներկայացուցիչը:

Տիգրան Տեր-Մարգարյանը բանակցությունների ավարտի հստակ ժամկետ չգիտի, սակայն, կարծում է, որ մեկ շաբաթվա ընթացքում պարզ կլինի:

Հարցին` Հայկ Մարությանի թեկնածությունը բանակցությունների առարկա՞ է, մեր զրուցակիցը պատասխանեց. ««Հանրապետություն » և «Լուսավոր Հայաստան » կուսակցությունների համար ընդունելի է Արտակ Զեյնալյանի թեկնածությունը: Մնացածը` բանակցություններից հետո»:

Լեւոն Փանոսյան